Mizopa zinga hmasa ber nihna hlu tak tak nei Dr LN Tluanga (93) chu Pathianni chawhnu khan a chawl ta.
Dr LN Tluanga hi kum 1933-ah Bukpui khuaah a piang a, Sialsuk leh Aizawlah lehkha a zir. Scottish Church College atangin 1955 khan BSc a zo a, mathematics subject-ah distinction-ah a pass. BSc a pass hnu ah sikulah kum khat thawkin MSc a zir chhunzawm a, kum 1974-ah Gauhati University hnuaiah PhD zoin Mizo zinga mathematics subject-a PhD nei hmasa ber a ni.
UT-a Mizoram ala awm lain Education joint director tura lak a ni a, Education director-ah hlankai zui niin, a hmasa ber a ni. Sawrkar hna a thawh lai mek hian hun puma Pathian rawngbawl turin a inpe a, Council for World Mission hnuaiah Kribati thliarkarah missionary hna thawkin an nupa in an chhuak a, zirtirtu hna a thawk a ni.
Ziakmi a ni a, a lehkhabu ziah zingah “Kawlkil Thleng Pawhin” tih bakah ama chanchin a ziahna “Ar Khawthim Dai” tih te a ziak a; “Kristian Hlimna Thuruk” tih pawh hriat hlawh tak a ni. Thianho zaipawl ‘A Hmangaihna Faktute’ dintu zing ami a ni bawk.
Science tihhmasawn kawnga nasa taka thawktu niin, ama hoa kum 1979-a an din Mizoram Science Society chuan a vawikhatna atan kumin May 13 khan ‘Science Award’ an hlan a, hemi tuma a awm mekna Aizawl Hospital & Reasearch Centre-ah May 31 chawhnu dar 3.00 khan a chawl ta a ni.
Amah hi Mission Veng Presbyterian Kohhran Upa a ni a, vawiin – June 1 hian biak inah a hun hnuhnung hman a ni ang.
Hmasa ber nihna ngah Dr LN Tluanga a liam
