Hmawngbuchhuahah vote 1 a awm
Lai Autonomous District Council-a Sekulh MDC biala awm Hmawngbuchhuah khuaah chuan vote khat chiah a awm a, MDC inthlanpui hnuhnung berah khan vote 204 a awm thung.
LADC-a member of District Council inthlanpui 12-na neih tura inbuatsaihna kal zelah Thawhlehni khan final electoral roll tlangzarh a ni a. Heta tarlan a nih danin, Sekulh biala Hmawngbuchhuah hian voter pakhat chauh a awm. LADC inthlanpui hnuhnung berah khan Hmawngbuchhuah hian voter 204 an awm a, mipa 93 leh hmeichhia 111 an ni.
The Aizawl Post thudawn danin, Hmawngbuchhuah khua hi Lawngtlai district-a Myanmar ramri bul Zochachhuah thlen hmaa awm a ni a. A tam zawk hi ramdang mi niin, Zakhai leh Kawl an ni ber. Kuminah uluk zawkin roll buaipui a ni a, voter pakhatah chauh an tla thla tih thudawnna chuan a sawi.
District election officer, bawrhsap Donny Lalruatsanga zawhchiannaah Hmawngbuchhuahah hian LADC emaw MLA inthlan emaw neih tawhnaah voter awm nual thin mah se, tun tumah hian uluk zawka endiknaah recognised schedule tribe an nihna tihchianna document pholang thei an awm mumal ta loa, voter pakhat chauh hian a paltlang thei ta tiin, The Aizawl Post zawhna a chhang a ni.
Final electoral roll a tlangzarhnaah district election officer hian inthlan felfai leh thianghlim nei turin electoral roll dik leh thianghlim neih hmasak a tul tih a sawi a. Roll-ah hian tih dik loh palh awm thei a nih rualin, a dik thei ang bera buatsaih a ni tih a sawi.
“India danpuiin electoral roll-a awm thei tur dan mumal tak min duansak a, tehna chi hrang hrang min duansak. A phakte roll-ah kan thun thin a, LADC huamchin phei chu ramdangmi leh raltlan awmna a nih avangin kan fimkhur a ngai hle,” a ti.
Final electoral roll-ah hian LADC huamchhungah MDC bial 25 awmah vote nei mipa 27844 leh hmeichhia 29013 awmin, a vaiin vote nei 56857 an awm. Polling station-a vote awm tamna ber chu Sangau East MDC biala Pangkhua a ni a, vote 1189 an awm. Vote tlemna ber chu Hmawngbuchhuah a ni.
Hmawngbuchhuahah vote 1 a awm
