Mizo hmeichhe zinga mi chhuanawm chawimawina dawng tlak nia an ngaih mi pali hnenah AIKO chuan chawimawina a hlan.
International Women’s Day 2023 puala AIKO buatsaiha Aizawla hun hmanah hmeichhe zingah engineer leh engineer in chief hmasa ber Er Lalhmingliani Hmar; vaihlo that loh zia mipui hnena hrilhhriat kawnga sulsutu Indian Society on Tobacco & Health Mizoram Lal Riliani, Mizo hmeichhia zinga High Court judge hmasa ber Justice Marli Vankung leh
Padma Shri B Sangkhumi te chawimawina an hlan.
He hun hmanpuitu minister Lalruatkima chuan Hmeichhiate Ni ah hmeichhiaten harsatna an tawh hrang hrang – an hnathawhnaah, hlawh zat bituk kawngah healthcare leh zirna kawng bakah ram leh khawtlanga hruaitu nih theihna kawngah khawvelin a zirchiannaah thil siamte hian chanvo inang kan nei tih a sawi.
Tun dinhmunah hma kan sawn tawh hle tih sawiin, ram leh khawtlang hruaitu zingah hmeichhia an awm nual tawh thu te; office hrang hranga officer-te zingah hmeichhia an tam thu te, zirna lamah pawh hmeichhiate chu hmahruaitu an nih zel thu a sawi a. Hmeichhiate chu inchhungkhur chhung chet zawng zawng bakah fate enkawl bertu ni chungin, nasa taka hma an sawn thei chu fak an phu hle tih a sawi a ni.
AIKO hi kum 2010-a din a ni a. Naupangte tana hma latu a nih bakah hmeichhiate hamthatna kawngah hma a la zel a ni. Tunah hian Vaivakawn Police Station-ah Family Counseling Centre a nei a, Central Jail-ah tang hmeichhiate tan Programe hrang hrang an buatsaih thin a ni. Hmeichhia ten engkawngah pawh harsatna, leh rahbehna an tawh changin free legal service a pe thin a ni.
Hmeichhe chhuanawm chawimawi
![](https://theaizawlpost.org/wp-content/uploads/tap_logo-min-large.jpg)