Hmeichhe Euro 2025 final:
England versus Spain leh bawk maw!
2023 World Cup final-an an lo insu tawh a, Spain champion lawm laiin an ram FA president-in khawvel hmuh laiin an player pakhat hmuiah a fawhsak a, boruak lianpui an siam zui ta kha a ni a; kha mi tuma inhmachhawnte bawk kha Pathianni zan UEFA Women’s Euro 2025 final-ah an insu leh dawn a, world cup final-a sikhat faia an ngam loh lakah Lionesses-in phuba an ngaihven dawn!
Euro 2025 semi-final pakhat zawkah Spain hian extra-time khelin Germany an paltlang hram a; world champion ni lai Spain chakna goal awmchhun hi minute 113-naa two-time Ballon d’Or winner Aitana Bonmati tihluh niin, a vawikhatna atan Spanish nulate’n Euro final an lut a, World Cup final rematch kan thlir dawn ta a ni.
Kum hnih liamta 2023 World Cup final-ah khan first half-a Olga Carmona goal hmangin England lakah Spain an chak a, Europe leh khawvela hmeichhe team tha ber ber pahnih bawkin Euro hmawr an bawk dawn a, world cup final-a lo intum hnaivai an nih bawk avang pawhin Pathianni final hi hmeichhe inkhelah chuan a lekpek awm lo tur a ni ngei ang!
Tarlan tak angin, kumin Euro final khel tur team pahnih hi tunhnai thla 24 chhunga khawvela hmeichhe team tha ber ber pahnih an ni a, tunah Europe team tha ber nih an inchuh zui leh dawn a, Euro 2022 final-a Germany an hneh tuma England forward Ellen White pawh khan tuntuma team pahnih insu leh tur hi a pui hle dawn tih a sawi lawk a, en hlan a nghaklel tawh takzet tih a sawi!
He Spanish team kan hmuh mek hian nikum mai khan Nations League title la bawkin, major trophy pathum a indawta lak an tumna kawngah defending champion England an su dawn a, English nulate hian an title kawl lai tal chu world cup-a an ngam loh team laka hum an tum ruh ve khawpin a rinawm!
Thla 13 liamta mai khan England women’s team hian Euro 2022 final-ah Germany hnehin a vawi khatna atan major title an hlawhchhuak a, Sydney khawpuiah khan 1966 World Cup-a an ram mipa team an champion hnua Fifa World Cup-a England senior team champion leh thei hmasaber nih an tum laiin Spanish team an hneh ta lo a ni.
Kumin February thla mai khan England hian Wembley khelmualah world champion an mikhual a, tunhnaia Spain hneh thei hnuhnungber niin, thla hmasa mai June ni 3 khan Spain hian 2-1-in England nulate hi an hnehlet ve leh a, Pathianni zan atan pawh hian chak zawk tur sawi lawk a har hle dawn a ni.
Ram pahnih tum 19 intawn tawhah chuan Lionesses-in head-to-head record an nei tha zawk a, vawi nga chiah Spain lakah an la tlawm a, mahse, hei hi tun Euro final atan tehfung a tling lo ang.
Hmeichhe Euro 2025 final:England versus Spain leh bawk maw!
