Hmeichhe laka pawikhawihtute
na taka hrem kan phut – Vanlalawmpuii
Manipur Zohnahthlak hmeichhiate chunga pawikhawihtute chu na taka hrem an phut tih Mahila Congress president Vanlalawmpuii Chawngthu chuan a sawi.
Mizoram Pradesh Mahila Congress Committee hruaitute thutkhawmah Vanlalawmpuii chuan Manipur buaina kalzela Meitei mipa rualten Zohnhthlak hmeichhe pahnih tenawm leh repthlak thei ang bera an ngaisa chuan an rilru a tih nat thu leh a tawrhpui thu a sawi a. Muapho taka pawngsual an ni chu engti kawng zawng maha hriatthiam theih a ni lo, tiin, “He thil titute lakah hian na taka action lak kan phut a ni,” a ti.
He thil thleng hian Mizoram chhung leh pawna awm Zohnahthlak zawng zawng kan tanrual a ngaih zia a tarlang chiang hle tih sawiin, Manipura Zofate tawrhna rapthlak tak dodal turin tanrual a ngai tih a sawi a ni.
Central-a BJP sawrkar leh Manipur BJP sawrkar hnuaiah hmeichhiate an him loh zia he thil thleng hian a tilang a ni, tiin, “Manipura thil thleng mek hian BJP rorelna hnuaia Zohnathlakte kan him loh zia a ti langchiang hle a. Kan tu leh fate, khawvel lo awm zel tur leh kan sakhua kan ram leh kan hnam a him theihna’n BJP rorelna kan dodal a ngai. Kan sahimna atan BJP leh a thawhpuite hi kan hnawl ngei ngei a ngai a ni,” Mahila Congress president hian a ti.
He buaina tireh tura Prime minister Narendra Modi leh a kaihhruai BJP sawrkar a la ngawi reng chu a dem takzet tih sawiin, Pu Zoramthanga kaihhruai MNF sawrkar pawh, National Democratic Alliance-a tel an nih angin, na taka aw chhuah turin an phut tih a sawi bawk.
Mahila Congress hruaitute thukhawm hian, tunhnaia rampuma ei leh bar, gas leh oil bakah thil dang dang man sang chak lutuk chu an duh loh zia lantirin Congress Bhavan kawtah thuziak kengin an dingkhawm a ni.
Hmeichhe laka pawikhawihtute na taka hrem kan phut – Vanlalawmpuii
