Beti Bachao Beti Padhao flagship hnuaia Mizoram Postal Division leh Women & Child Development department tangdun hmalakna, hmeichhe naupang hmakhua ngaihtuahna ‘Project Thaichhawninu’ tih chu W&CD minister Lalrinpuii’n Thawhlehni khan Aizawlah a tlangzarh.
Minister chuan, he project hi hmeichhe naupangte hamthatna leh nu leh pa mawhphurhna tilang thei a ni tih a sawi a. Fanute chu ram leh hnam innghahna an ni a, an hmakhua chu Mizoram hmakhua a nih avangin chumi ngaihtuah chu nu leh pate mawhphurhna pawimawh pakhat a ni tih a sawi.
“A fanu Mauruangi damkhawchhuahna atan a nu in theitawp a chhuah ang khan, faten hmakhaw eng tak an neih theihnana kaihhruai leh venhim chu nu leh pa tin koa tla a ni a. Nu leh pa, pi leh pu bakah nau piang thar nei zawng zawng, kum 10 la tling lo hmeichhe naupangte tan SSY account hawnsak theuh ang u,” Lalrinpuii hian a ti a. Chumi kawngah chuan kohhran, tlawmngai pawl, Anganwadi worker, ASHA, zirtirtute leh Postal department-a thawktute tanrualpuiah a sawm tih a sawi a ni.
Project hming ‘Thaichhawninu’ hi Mizo thawnthu hlun tak pakhat, Mauruangi leh Bingtaituki thawhnthu atanga lak a ni a. Tunlai nu leh paten Sukanya Samriddhi Account hmang hian an fanute hmakhua atan an inpek ve theihnan he project hi duan a ni.
Project Thaichhawninu hi Mizoram district 11-a RD Block 27, ICDS huamchhung khaw hrang hrangah kalpui tum a ni a. Project hnuaiah hian hmeichhe naupangte chu Post office leh State Bank of India kaltlangin account hawnsak theih an ni. Anganwadi worker leh Postal department thawktuten khaw tinah awareness leh account hawn runpui an nei dawn a. Ruahman ang chuan, thla 10 chhungin kum 10 hnuailam hmeichhe naupang 4050 ziahluh hman tum a ni. Tunah hian Mizoramah hmeichhe naupang 18560-in SSY account an nei tawh a, kum 10 hnuailam projected population nuai 1 leh sing 5 chuang atanga chhut chuan tan lak a la ngai hle tih sawi a ni.
Hmeichhe naupang kum 10 hnuai lam bank account hawn sak theih
