Serchhip district-a hmasa ber leh a awmchhun, high school leh higher secondary school-a hmeichhe zirlaite a thlawn veka an awmna tur Netaji Subhas Chandra Bose Avaslia Vidhyalaya Secondary Hostel (NSCBAVSH), Thenzawl Vengchhak ami chu Ningani khan Serchhip district education officer, Samagra Shiksha district project coordinator ni bawk Lawmawma chuan a hawng.
DEO chuan high school leh higher secondary school zirlai hmeichhe naupang tana hmalakna hi Samagra Shiksha atanga ruahman a nih thu leh Thenzawla hawn tak chu Serchhip district-a hmalakna hmasa ber a nih thu a sawi a. A tul dan azira hostel tam zawk nei thei tura hma an lak thu a sawi bawk.
He hostel-ah hian seat 30 awmin, seat khat hi mamawh zualte tana hauh bik a ni a. Hostel-a awm tur naupangin security deposit Rs.1000 an dah ve a ngai a, hei hi laklet leh theih a ni.
NSCBAVSH hawn takah hian Thenzawl leh a chhehvel khuaa high school chin chunglam hmeichhe zirlai 29 an awm dawn a, vawiin – Spetember 1 atang hian an lut dawn a ni. Zirlaite hian ei leh in bakah mutbu leh an mamawh tul dang a thlawn vekin an dawng ang. Tunah warden hoin thawktu 7 an awm a ni.
Hmeichhe tan a thlawna hostel awm theihna siam
