Hmeichhe VC Inkhawmpui hmang

Hmeichhe VC Inkhawmpui hmang
Rural Development & Administration Department buatsaihin Mizorama a vawikhatna atan Ningani khan Aizawlah ‘Village Council Hmeichhe Inkhawmpui’ hman a ni.
Hmanpuitu Health & Family Welfare minister Lalrinpuii chuan, hmeichhiate chawikan an nih theihnan 73rd leh 74th Amendment Act hmangin Panchayat leh tualchhung inrelbawlnaah 33% women reservation a awm a. Parliament pawhin kum 2023 khan hmeichhiate tan 33% reservation a lo pass tawh tih a sawi. Tun hnuah Mizo hmeichhiate zingah hruaitu tha leh fel tak tak thahnem tak an awm chu chhuanawm a tih thu a sawi bawk.
Hmeichhiate dinhmun a that zel rual hian, mawhphurhna sang tak an nei chho ve zel tih sawiin, hmeichhe village council member-te chu mahni inring tawk leh lu zo taka an nihna hlen chhuak turin a fuih. Mipui thlantlin an nih angin mipui tan rinawmna nena hna thawk a, tualchhung inrelbawlna kawnga a chhia leh hmaih awm siamtha turin a chah.
RD&AD minister Prof Lalnilawma chuan Mizo zingah hmeichhiate chawisana an awm chu a lawmpui tih a sawi a. Hmeichhiate chu thawhhonaah an tangkai bakah an pawimawh tih a sawi. VC hmeichhe hruaitute chu VC fund an dawnte khawtlang hmasawnnaa hmang a, VC puala sum hailuhna siam thiam tur leh a tulnaah chuan department-in puih a inhuam thu a hrilh bawk.
Hmeichhe MLA pahnih – Aizawl South III bialtu Baryl Vanneihsangi leh West Tuipui bialtu Prova Chakma pawhin an telpui a. Khawmpui hi sawrkar laipui leh Mizoram sawrkarin tualchhung inrelbawlnaa hmeichhiate hmun pawimawh tak luah tura ruahmanna a kalpui mek denchhena tih a ni.
Local Administration director Dr Lalngura Tlau chuan, “The Mizoram Village Council Act 2025” a sawizau a. He dan thar hi India rama Panchayati Raj system zulzuia duan niin, sawrkar laipuiin Gram Panchayat hnuaia a duan – own source of revenue (OSR) chungchang a sawizau. Tualchhung khua an lo intodelh a, mahni kea an intun din theihnan OSR neih tam theih dan, chhiah khawn theih leh sum tihpun theihna kawng he dan thar hian a hrilhfiah vek tih a sawi a ni.
Administrative Training Institute director Rita Lalnunmawii Pachuau chuan khawtlang inrelbawlna leh tualchhung sum leh pai dehchhuah tih pun kawnga khawtlang hruaitu atana thlanchhuah hmeichhiate tih tur leh an pawimawhna lam a sawi bawk.
Autonomous District Council huamchhung ni lo Mizoram district 9 dangah VC seat awm zawng zawng 2414 niin, hmeichhe tana hauh (reserved seat) 615 a awm a. ADC bikah Chakma ADC-ah seat 516 awmin hmeichhe tana hauh 88, Lai ADC-ah seat 595 awmin reserved seat 99, Mara ADC-ah seat 591 a awm a, hmeichhe tana hauh 99 tho a awm. Khawmpuiah hian 503 an tel a ni.