Hmeichhia 13-in an chanchin ziak tawh

Autobiography an ti a, mahni chanchin ziahna bu. Chutiang
chu khawvel lehkhabu ngaihsan a ni a, hralh a tla bawk. Mizo tawnga ziak chutiagn bu chu hriat theih chinah bu 130 chuang a awm tawh tiin a sawi theih ang.
Mizo Writers Association president, Mizo Language Development Board chairman ni bawk R Lallianzuala’n autobiography awm zat hi a chhut a, 139 a chhiar thei.
A chhiar theih chinah mi 139-in an chanchin a buin an chhuah tawh tihna a ni a, chung zingah chuan hmeichhe ziak bu 13 a awm.
Mizo autobiography bu-ah hian a hmasa ber chu R Vanlawma ziak “Ka ram leh kei” tih kha a ni a, 1965-a mi a ni. He lehkhabu hian zuitu a nei lawk lo a, 1978-ah H Lalsiama ziak “Hmasawnna kawl eng” tihin a zui chauh. 1983-ah A Thanglura ziak “Zoram politic lumlet dan” tih a chhuak leh a, 1985-ah K Zawla ziak “Zawltling vawn nat leh keimah” tih, 1987-ah Rev Lerthansung ziak “Rawngbawl tura piang” tih a chhuak leh. Heng hi 1990 hma lama autobiography chhuakte a ni.
1990-ah Ch Saprawnga ziak “Ka zin kawng” tih a chhuak leh a, 1992-ah Lalzawmliani ziak “Pathian hruaina kawng” tih a chhuak leh. 1992-a mi hi hmeichhe kutchhuak hmasa ber a ni.
1990 atanga 1998 thlengin bu 13 a chhuak a, 2000 hnuah a pung chak ta deuh tiin a sawi theih ang. 2002-ah bu thum a chhuak a, 2003-ah bu li, 2005-ah bu thum, 2006-ah bu li, 2008-ah bu li a chhuak. 2011-ah phei chuan bu riat a chhuak a, 2012-ah pawh bu nga a la tling. 2014-ah bu sarih a chhuak leh a, 2018-ah pawh bu sarih a chhuak leh.
Autobiography bu hi tun hnaiah a pung a, 2020-ah khan bu 11 a chhuak. 2021 leh 2022 te kha a tam ber kum a ni a, bu 13 ve ve a chhuak. Kuminah bu kua a chhuak tawh.
Bu 139 zingah hian hmeichhe kutchhuak bu 13 a awm a, a hmasa ber 1992-a mi kha 1998-a chhuak “Ka damna Isua” tih, Lalhriatpuii ziakin a zui. A hnuhnung ber chu tun hnaia mi, “A nung ka hria” tih, T Lalhmachhuani (Mimii) ziak a ni.
Lalzawmliani, Lalhriatpuii, Hmingthansangi, Lalrinkimi, Vanlalpeki, Laldawngliani, Teresa Rothangpuii, V Chhawnkimi, Thanchhungi Saza, Lalthlamuani Hnamte, Evan Lalthanpuii, Vanlalruatpuii Chawngthu leh T Lalhmachhuani (Mimi) te hi hriat theih chinah autobiography ziak tawh an ni.
A chhuttu R Lallianzuala chuan autobiography hi a rin aia a tam thu a sawi a, “Ka rin aiin kan lo ngah a, hetiang zat ka beisei lo. 100 a tling ang em aw, ka ti chauh kha a ni a,” a ti.
Autobiography lamah tan zel a ngai tih a sawi a, hnam tan a hlu a, thangtharte lo chhiar atan ziah zel a tha a, chu chu hmasawn nan a tul, a ti.