Hmeichhe ui nei i ngaizawng a nih chuan an ui pawh i ngainat ve viau a ngai, i ngaina lo a nih pawn hlim taka awm i duh chuan a der tala i ngainat a ngai, niin scientist ten an sawi.
Mithiam ten zirchianna an neih tharah chuan hmeichhia ten an ran vulh te an ngainat ang bawka an kawppui ten an ngainat ve hian hmeichhia chu an hlim a, an inngaihzawnna boruak a tha duh zawk niin an sawi.
Chutihlaiin mipa ran vulh te hmeichhia-in a ngaina ve emaw, ngaina ve lo emawin mipaah chuan nghawng a nei chuang lo niin an sawi bawk.
University of Houston-a mithiam ten zirchianna hi neiin, an hotunu Kristen Capuozzo chuan, “Mipa te chuan hmeichhiain an ran vulh te an ngainat leh ngainat loh hi an ngaipawimawh lem lo, an thenga thawngah a thawk ve lo,” a ti.
Capuozzo ngei pawh hian ui a vulh a, mi thenkhatin titi phunglenga an sawi thin, ngaihzawngte leh an ran vulhin inzawmna a neih tak tak leh tak tak loh hriatchianna duh neiin, a thawhpui te ten research an nei ta a ni.
Zirchianna atan hian inngaizawnglai mi chi hrang hrang tuak 120 te chu questionaire an chhan tir a, an ran vulh an ngainat dan leh ngaihzawng te nena an inkar boruak te hriat tumin, inkawp lai te chuan questionaire hi a hrang theuhin an chhang a ni.
Heta tanga an hmuh dan chuan hmeichhia te chu an ngaihzawng/ kawppui ten an ran vulh an ngainat vein an hlim lehzual niin an sawi hlawm a, mipa te erawhin an ran vulh te hmeichhiain an ngainat leh ngainat lohin kori a tu hran lo niin an sawi ve thung.
Chutih rualin hmeichhia chuan a ran vulhin a ngaihzawng/ kawppui amah aia an ngaina zawka an hriat chuan a hlim loh phah leh hlauh thung a, a thik deuh a ni awm e.
He zirchianna chungchang hi Soceity for Personality and Social Psychology annual meeting, January, 2012-a San Diego-a neihah Capuzzo hian a report a ni.
Hmeichhia leh uite
