Aizawl Municipal Corporation Election 2026 chu nimin khan tluang taka neih zawh a lo ni leh ta a. Nimina chanchinthar buatsaih laia hriat theih chinah, vote tla zat (voter turnout) hi 60.79% a ni a; AMC inthlanpui hmasa kum 2021 (16th February)-a voter turnout 64.19% aia a hniam zawkna chu 3.4% a ni.
Tun tum AMC election-ah hian voter awm zat chu 2,39,985 niin, mipa 1,10,335 leh hmeichhia 1,29,650 a ni a. Nimin election-ah khan mipa 65,596 leh hmeichhia 79,254-in vote an thlak a. Vote awm zat atanga vote tlak dan chu mipa 59.5% niin, hmeichhia 61.1% a ni. Vote thlaktu mipa aia hmeichhia an tam zawkna hi 13,648 a ni bawk.
Vote tlak dan atanga han ngaihruat mai theih taka chu, Aizawl khawpuia vote nei thei chin mi nuai hnih chuang zingah hian, mipa aiin hmeichhia-in Aizawl khawpui inrelbawlna thil an ngai pawimawh zawk, tih hi a ni.
Inthlang rama awm kan ni a, mipuiin kan aiawha rorel tur mi kan thlang thin a. Mipui aiawha roreltu turte chu tu te nge tih chik taka ngaihven a, mi dik leh rinawm, mi taima leh thahnemngai, mawhphurhna la ngam mi an ni em tihte, mi tha nge an nih mi tha lo tih te, hei hian kan aiawhin ro rel dawn se, kan ai a awh zo ang em? tih te chhut ve neuh neuh chunga vote hi thlak tur a ni, tiin sawrkar chuan mipui hnenah awareness tha takin a pe thin. Chu chu a hmei apain kan dawngsawng a, chutah chuan mipa aiin hmeichhiate bawk hian an lo dawngsawng thain an ngai pawimawh zawk a nih hi tih theih turin vote thlaktu zingah hmeichhia an tam zawkna hi a sang hle a ni.
Hei hi a chianna pakhat chu, eizawnnaah pawh hian, mipa aiin hmeichhiate bawk hi an langsar a. Mizo hnam hi chhungkaw inrelbawlnaa mipa lal zawkna (Patriarchal family) kan ni chung hian, a enga kim mai deuhthawah hian hmeichhiate hi an phusak tawh zawk avangin hmeichhe lalna (Matriarchal family) ang mai hian kan khawsa chho ta ni mai hian a ngaih theih a. Hnam dangte hian min han bel chiang tak tak se chuan, hmeichhe lalna chhungkua in nih hi’ min ti duh mai awm e.
Ram inrelbawlna thilah pawh hian, hmeichhiate hi women reservation tel lo chung pawhin rorelna in sang ber legislative assembly-ah pawh hian, a ngaihventu zawk na na na chuan hmun pawh an la chang tam zawk nge ngein a rinawm ta hial mai.
Hmeichhiain ram inrelbawlna ngaihven zawk…?
