Hmeichhiate an thunun nasat vangin Taliban hotute man tum

Hmeichhiate an thunun nasat vangin Taliban hotute man tum
International Criminal Court (ICC) chuan Aghanistan-a Taliban hotu lawk pahnih chu hmeichhia leh hmeichhe naupang chunga an chet dan avangin manna tur thupek a chhuah.
ICC judge-te chuan Thawhlehni khan Taliban Supreme Leader Haibatullah Akhunzada leh chief justice Abdul Hakim Haqqani te chu mihring nihna behchhana tihduhdahna kalpuitu nia puhnaah man theihna chhan tha tawk an awm niin a sawi.
“Taliban hian an mipui zawng zawng tan khapna leh khuakhirhna an kalpui karah hmeichhia leh hmeichhe naupangte chu an nihn avangin an bitum a, an fundamental right leh zalenna an palzutsak a ni,” tiin court chuan thu a chhuah.
ICC judge-te hian Taliban hian hmeichhia leh hmeichhe naupangte hi lehkha an zir theihna, an mi mal thil leh chhungkua, an chet vel theihna, an duh an sawi theihna, an ngaihtuah leh sakhuaa dikna chanvo an palzutsakin zalenna an neihtir lo niin an sawi a ni.
Taliban chuan an hotute man tumna hi rang taka chhang letin ‘tanchhan tha nei lo’ tiin an sawi a, an pawl leh sorkar chuan ICC thuneihna hi an pawm ve lo va, court hian Gaza-a ‘ni tin hmeichhia leh hmeichhe naupang thihna thleng’ titawp thei lovah a puh let.
Taliban sorkar thupuangtu, Zabihullah Mujahid chuan, “Islamic Emirate-a hruaitu leh thuneitute hian Afghanistan-ah hian Islamic Sharia dan thianghlim behchhanin mihring nihna inang lo zulin ro an rel mai a ni,” a ti.
Kum 2022 tawp lamah khan Muslim tamna ram – Turkiye, Saudi Arabia leh Qatar te chuan Taliban-in hmeichhiate lehkha zir a phalsak lo chu an dem thu an lo saiw tawh.
ICC chuan Thawhlehni khan US sipaiten Afghanistan an chhuahsana thuneihna an chan hnu, August 15, 2021 atang khan Taliban hian kumin January 20 thleng khan hmeichhiate chungah dik lo takin an che niin a sawi.
Nikum khan UN chuan Taliban sorkarin hmeichhe naupang maktaduai 1.4 vel chu lehkha an zir an phalsak lo niin a sawi a. Thuneihna an chan leh hmaa sikul kal hmeichhe naupang 80% velin an zir thei tawh lo va, maktaduai 2.5 an tling niin an sawi.
Hmeichhiate hi sorkar hnaah tih loh an thawh an phalsak lo va. Beauty salon khar a ni a, vantlang intihhlimna leh gym-a kal khap niin mipa tel lova an zin phalsak an ni lo bawk.
Mihring dikna chanvo humhalhtu, Amnesty International leh Human Rights Watch (HRW) chuan ICC thutlukna hi lawmawm an tih thu an sawi.
Nikum khan ICC hian Israeli Prime Minister Benjamin Netanyahu leh a defence minister thin, Yoav Gallant te chu Gaza-a indonaa dan bawhchhiaa puhin manna thupek a lo chhuah tawh.