Hmeichhiate Ni denchhenin thenawmin bai insuah tawn

Hmeichhiate Ni denchhenin
thenawmin bai insuah tawn
Kumin International Womens Day 2026 denchhenin Inrinni leh Pathianni khan pawl leh kohhran hmeichhiaten hun hrang hrang an hmang. Hmun thenkhatah chuan Mizote induhsakna – thenawm nu hoin bai an insuah tawn.
Hmeichhiate Ni – International Womens Day (IWD) hi March 8 a ni a, March pum hian a ‘thla’ angin hman tel thin a ni bawk. Kumin hi a vawi 115-na a ni a, Pathianni ah a tlak avangin Mizoramah chuan ni inangah hman a remchang loa, thenkhatin Inrinni khan an hmang a, thenkhatin Pathianni khan an hmang. State sawrkar chuan March 18 hian a hmang dawn a, district thenkhat March 10-a hman tum pawh an awm.
Kumin IWD thupui chu “Pekin Lukhawng A Nei” (Give to Gain) tih a ni a. Sawrkar chuan he ni ngaihlua hmang duh tan mahni veng leh khuaah leh kohhranah a theih ang anga hmang turin a chah a. March thla chhung hian pawl hrang hrang chu he ni denchhana program hmang tura ngen an ni.
IWD hman chhan leh hmang tura infuih dan langsar zualah – kawng hrang hranga hmeichhe hlawhtligte inlawmpui sak a, hmasawn zel tura infuih tawn; mipa leh hmeichhia kar zau lutuk tih zim zel – zirna kawng a ni emaw, hruaitu nihna kawng emaw, hmeichhe chunga hleihlenna thleng thin leh hnathawh inang hlawh inang chungchangah; thupuiin a ken anga mahni phak tawk theuha harsa zawkte tanpui, lekhathiam zawkte midang tana luanchhuah, roreltute pawhin hmeichhiate a theih ang anga chawisan kawnga hma lak, tihte a ni.
Pawl thenkhat chuan Inrinni khan an hmang a, khua/ veng hrang hrangah MHIP hmalakna in thenawm nu hoin bai an insuah tawn a; Mizoram Gorkha Women Association branch hrang hrang chuan IWD denchhenin mi harsate thil pek, khawlaia ei leh in tur neilote tan chaw pek leh hnatlang an huaihawt a, tunkar chhungin program dang hman tum an la awm bawk.
Kohhran hmeichhiaten an hmang a. Catholic chuan Christ the King Cathedral Kulikawnah chawhma hun chu International Women’s Day anih angin hmeichhiate inkhawm chanvo pek an ni a. Catholic kohhran hnuaia tualchhung kohhran hrang hrang chuan banner siamin, Diocese Catholic Hmeichhe Pawl director thuchah chhiarchhuah a ni.
Salvation Army Women’s Ministries India Eastern Territory chuan Inrinni atang khan IWD denchhen hian hun an hmang tawh a. Tanpui ngaite puih bakah IWD discount neih a ni. Pathianni inkhawmah Salvation Army Women Officer-te tan hun siamsak an ni a, IWD puala thutawi sawi a ni.
Seventh Day Adventist Hmeichhe Pawl pawhin inkhawm thei tawh lo damlote IWD denchhenin an tlawh chhuak a, damlo kanin an tawngtai sak.
Kohhran leh pawl thenkhat chuan damdawi in tlawhin poor fund an hlan a, damlo kan bakah damdawi in tan thilpek dang an hlan bawk.
All Mizoram Elected Women Representatives chuan IWD denchhen hian Synod Hospital Durtlanga damlote tan luangchhuakin damlo 300 tan chawchhun – lunch pack an pe. Pawl aiawhin AMC corporator C Lalchhandami’n thuchah a sawi a ni.