Hmeichhiate tan sorkar hna 50% hauhsak an ni ang : Rahul Gandhi

Congress chuan thlan tlin an nih chuan sorkar hnaah 50% chu hmeichhiate tan an hauhsak dawn tiin party chief hlui Rahul Gandhi chuan a sawi a. Hmei chhia te chakna chuan India a thlak danglam dawn a ni a ti bawk.
Gandhi chuan hmei chhia pathum zela pakhatin hna nei mek ang an ni a, sorkar hna 10 zelah pakhat chauh chu hmeichhia ten an chelh a ni a ti bawk.
“India mipui 50% hi hmeichhia an ni lo em ni? Higher secondary leh higher education ah hmeichhia te 50% chung lam an ni lo em ni? Chutiang ni si, system a an share a tlem em em?” tiin Congress chief hlui chuang a sawi a.
“Congress te chuan ‘aadhi Abaadi Poora Haq’ kan duh a, hmeichhia te theihna tak tak chu ram enkawlna kawngah sorkar ah contribution inang tlang an neih hunah chauh kan hmang tak tak thei dawn tih kan hria a ni,” tiin Rahul chuan a sawi bawk.
Chuvang chuan Congress te chuan sorkar hnalak thar apiangah 50% chu hmeichhiate tan dahhran nise kan ti a ni, tiin a sawi a.
“Parliament leh assembly-ah te women’s reservation chu kalpui nghal kan phut bawk” tiin Gandhi chuan a sawi bawk.
Hmeichhia sum lakluhna mumal nei, hma lam hun ngelnghet leh mahni inrintawkna nei te chu society tan chakna a ni tiin a sawi bawk a.
“Sorkar hnaa 50% hmeichhiain an luah chuan he rama hmeichhia tin te chak zawka siamin hmeichhe chakna chuan India hma lam hun a thlak dawn a ni” tiin Gandhi chuan a sawi bawk a.
Nari Nyay five guarantees hnuaiah Congress te chuan India mirethei chhungkaw tina hmeichhia pakhat zel hnenah kum khatah Rs 1 lakh an pe dawn tiin a sawi bawk. Thuneihna an chang a nih chuan central sorkar hnuaia hna lak reng reng 50% chu hmeichiha te tan hauh a ni ang a ti bawk a. Chu mai bakah central sorkar hnuaia ASHA, anganwadi leh Mid-Day Meal workers te hlawh chu a leta tihpun a ni ang a ti bawk.
Congress-te chuan hmeichhia tena an legal rights an hriatchian theih nan panchayat tinah Adhikaar Maitri an din dawn a ti bawk.
Heng bakah hian hmeichhe hnathawkte awmna turin Savitribai Phule Hostel chu district tinah din a ni ang a, heng hostel te hi hmeichhia hnathawk tena awm nana an hman theih tur a ni ang, a ti bawk.