Mizoram hmeichhiaten Manipur buaina, a bikin hmeichhiate chunga nunrawnna thleng chu ngaihven a, chhuichiang turin National Women Commission leh National Human Rights Commission hnenah an thlen.
Aizawl Municipal Corporation hmeichhe corporator-te chuan National Women Commission chairperson hnenah ziaka thlenin, Manipur buainaa hmeichhe zahawmna tihbawrhban a ni thin leh kutthlak, pawngsual leh thah hial an tawk fo mai chu pawi an tih thu leh hriatthiam har an tih thu thlenin, amah ngei Manipur-ah kal a, thil awm dan ngaihven tur leh thilsual titute na taka hrem an nih ngei theihna’n hma la turin an ngen.
AMC hmeichhe corporator-te hian Meitei mipaten Naga hmeichhia an thah chhungte hnenah Manipur sawrkarin cheng nuai 10 zangnadawmna pek leh vanduaina tawk fanu, kum a tlin huna sawrkar hna pek a tiam anga tribal hmeichhe dang, Meitei hoin rawng taka an thahte pawh state sawrkarin zangnadawmna a pek an phut thu an sawi a. Tun hnuah North East hmeichhiate humhim an nih theihna tura hma la turin NWC chairperson hi an ngen bawk.
NWC hnena an thu thlen tur hi Mizoram State Women Commission chairperson kaltlangin an thawn a ni.
Mizoram Primary Teachers’ Association (MPTA) State Womens’ Network pawhin, kumin May 3 atanga tun thlenga Manipur Meitei leh tlangmite inkara buainaah an hmeichhiatpuite tawrhna nasa chu an dem tih a sawi a. ‘Nu leh laizawn kan nihna atang leh hmeichhia kan nihna atangin, hetianga rawng tak leh rapthlak taka Kuki-Zo laizawnte an khawih a, mualpho thei ang bera saruaka kawng zawhpui a, nawmnah taka khawih leh sawisaa an pawngsual kan hmuh leh kan hriat hi kan dem a. Hmeichhiate laka chet hi a rawngin a rapthlak kan ti hle a. Kan hmeichhiatpui unaute tuarna, mualphona leh tih tlawma an awm hi kan tawrhpui takzet a ni,’ a ti.
MPTA State Womens’ Network chuan National Human Rights Commission chu he buaina chhuichiang turin a ngen tih a sawi a. Hemi chungchanga rorelna dik a lanchhuah a, pawikhawihtute chu an phu tawk hremna a ranglama pek an nih theihna’n hma la turin a ngen tih a sawi a ni.
Hmeichhiaten NWC leh NHRC hnenah Manipur buaina chhui phutna thlen
