March ni 22 khan World Water Day a ni a, Mizoramah pawh Aizawl leh district hrang hrangah he ni hi hman a ni.
Kolasib-ah chuan Parish Hall-ah PHE department huaihawtin he ni hi an hmang a, LAD minister K Lalrinliana’n a hmanpui.
Tui thianghlim renchem leh dahkhawl ngaih pawimawh a tul thu a sawi a, tui hmangtu kan pun zel avangin khamkhawp nei tur chuan buaipui nasat a ngai tih a sawi.
He huna khualzahawm John LT Sanga, district bawrhsap-in a sawi danin, an district-a khaw 48-a chhungkaw 9038 zinga 8728 chu tui thianghlim dawng thei tura thlun zawm anga chhinchhiah an ni tawh tih a sawi.
Lungleiah chuan PHE Department, Lunglei District leh North East Initiative Development Agency (NEIDA) tangrual buatsaihin PHED Conference Hall-ah he ni hi an hman a, district bawrhsap Ramdinliani khuallian a ni.
Khawvel changkang chho zelah ramngaw leh nungchate kan tichereu nasa hle a, ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin theihtawpa tan kan lak a tul a ni tiin, scientific management of land zulzuia agriculture leh a kaihhnawih hmalaknate pawh kan kalpui a hun tawh tak zet a ni, a ti.
World Water Day hmannaah hian March ni 6, 2023-a India ram president hnen atanga National Water Warrior Award dawngtu HS Lalawmpuii, Sairep VCP chawimawina hlan a ni.
Lawngtlai-ah chuan PHE Department buatsaihin PHE office complex-ah he ni hi an hmang a, khuallian chu David Lalthantluanga, district bawrhsap a ni.
Khawvel thang mekah tui harsatna tikiang tura danglamna thlen turin mi tin leh sorkar thawhhona a pawimawh tih a sawi a, United Nations pawhin khawvel pum huapa tui leh thianghlimna kawnga hmasawnna chu a ngaih pawimawh thu a sawi. Khawvel hmasawnna kal mekah bawlhhlawh leh hnawm paih kawngah mipuite fimkhur tura chahin, kan bawlhhlawh paih dan leh paihna hmun hian tuihna leh tui thianghlim kan neihna kawngah kawngro thui tak a su a ni, a ti.
Mamitah chuan Chhimveng YMA Hall-ah an hmang a, district bawrhsap Lalnunhlua chu khuallian a ni.
Ramngaw chereu zelin tuihna a titlem a, kan bawlhlawh paih fimkhur lohin kan tuilakna kawngah harsatna tam tak min thlen thin bawk, chung chingfel tur chuan department pakhat chauh thawh theih a ni lo a, kan zavaia tanrualna leh hmalakna a ngai a ni a ti.
Champhaiah chuan PHE department leh District Water & Sanitation Mission (DWSM) tang dun buatsaihin zing karah I&PR Auditorium-ah hun an hmang a, CHANEM Building atanga Circuit House thlengin World Water Day Rally neiin kawng an zawh bawk.
Water Day hmannaa khuallian James Lalrinchhana, district bawrhsap chuan Pathian thil thlawn pek hrang hrangte humhalha tihpun a tul thu sawiin, kalkhawmte chu a tha zawnga danglamna thlen tura bultan tum tur leh, kum tluana World Water Day hmang turin a fuih. Khawvel pumah mamawh khawp tui dawng pha lo mi maktaduai hnih vel an awm thu a sawi a, Champhaiah ngei pawh tun hma lam ngaihtuahin tuihna a tlem zel thu leh, khawpui tui tlan ber khawchhak Tuipui hna leh tui luang zat pawh a tlem tial tial thu a sawi.
Hmun hrang hrangah World Water Day hmang
![](https://theaizawlpost.org/wp-content/uploads/2023/03/water-1024x769.jpg)