Kan dam laia YMA hlutna kan hmufiah ta lo a nih pawhin, kan thih hunah, kan ruang an hlawm hunah tal kan hmufiah thin tih chief minister Lalduhoma chuan a sawi. YMA Day vawi 90-na chu Inrinni khan hmun tam zawkah hman a ni a. Veng/ khaw chhung tifaia hnatlang, section inelna leh intihhlimna, awmni khama ruai nena hmang, thil tha dang tihna atana hmang leh kawng danga hmang an awm. Kumin YMA Day hi Pathiannia a tlak avangin a tam zawk hian Inrinni – June 14 khan an hmang a, thenkhatin June 13 khan hmangin, thenkhat chuan vawiin – June 16 hian an hmang dawn. Remchan zawkna avanga hmun hun tur la pawtfan deuh an awm bawk.
Chief minister hian a biala Neihloh khuaah YMA Day a hmanpui a. YMA chu a din tirh phat atangin tanpui ngaite tanpuitu, Zofate tana pawl tangkai leh zahawm ala ni reng a. A hlutna a hniam thei lo tih a sawi.
“Mi thenkhatin YMA ropui zia an la hmufiah lo a nih chuan lungngaihna leh harsatna an tawh ni ah an hmu ngei ang. An fel vang emaw an that vang emaw niloin, Zofa an nihna vang ringawtin YMA hian a la tuamhlawm dawn. An damlaia a tuamhlawm ta lo a nih pawhin an ruang tal chu zah takin thlanmualah a phum ngei ang,” a ti.
Tunhnaiah ruahpui vangin Mizoram-in chhiatna a tuar nasa a, chhiatna thlenna apianga tanpuitu langsar ber chu YMA a ni tih Lalduhoma hian a sawi. An tanpuina dawngtu, a bikin hnamdangten nasa takin an lawmna thu social media lamah an pho chhuak a. Mizo min tihmingtha em em tih a sawi a ni.
Ram leh hnam din chhuahna tur chu thawhchhuah tam tak nei ram kan nih a, hnamdangte mamawh pe thei khawpa kan san hun a ni tih sawiin, “Chu dinhmun thleng tur chuan YMA member-ten hmathlir fel tak neia hna kan thawh a ngai. Kan ram siamtha tur hian hnamdang an rawn kal dawn loa, kan tu leh fate rawn tih atana dah chi pawh a ni lo. Keini, tuna chhuan awm mekte hian thlentir tum ang u,” chief minister hian a ti.
ITI Veng Branc-in YMA Day puala hun an buatsaih a hmanpuinaah Central YMA president Lalhmachhuana chuan, YMA chu tanpui ngaite tanpuitu, pawl zahawm leh pawl thianghlim a ni, tiin, hemi a nihna tilang thei tura a mamawhtute tana thil hlu leh ropui tak, in sak sak a ni chu lawmawm a tih thu a sawi a. A tihsaktu tan leh a dawngtu tan he ni ah hian hlimna leh lawmna min thlen tih a sawi. “Midangte tan malsawmna thlentu leh midang tana thiltha titu, tlawmngaihna thinlung neitu nih tum zel ang u,” a ti.
YMA ITI Veng Branch hian ‘Kum 2025 YMA Day Thilpek’ atan an venga cheng, parawl chu in an sak that sak a. He in sak hi Inrinni zing khan Central YMA president hian a hawng a ni.
Hmun hrang hrangah YMA Day hmang Kan thih ni-ah YMA hlutna kan hmufiah. – Chief minister
