Tunhnai ni thum chhung khan Mizoram hmun hrang hrangah ruang pathum chu an thih chhan hriat mai loha hmuh a ni a, midang kut tuar nia ngaih an awm.
Thudawn danin, August 25 – Pathianni chawhma khan Thahleiiangi (54), Champhai Vengthar chu a chenna in bul a dawr chhungah thia hmuh a ni a. A taksaah hriamhreia kut thlakna hmuh niin, a hliam tuar loin a thi nia ngaih a ni. Pathianni chawhma inkhawm bang chuan a dawra thil lei tur nia insawiin a dawr chu hawn tirin, hemi hnu lawk hian a dawr chhungah a ruang hi hmuh zui a ni ta nia thu dawn a ni a. A thih hun hi chawhma dar 10.30 leh 11.00 inkar nia rin a ni. He chanchin buatsiah lai thleng hian pawikhawihtu nia ngaih hi man an la awm loa, dawra a kalpui hian kawr sen a ha tih sawi niin, Champhai Police chuan an chhuizui mek.
Inrinni tlai dar 4- 5 vel khan Tlawng lui fintu, Vailuiin Zawngkawt lui a finnaah tu tih hriat loh mipa ruang lungin a chilh beh chu hmuh a ni a. He chanchin buatsaih lai hian tunge a nih hriat a la ni lo. Thudawn danin, chakai khawrha kal mi pahnih chuan tui chungah kut leh ke rawn lawrchhuak, a taksa dang zawng tuiin a chim chu an hmu a, mautuai khawrha kal midang pakhat hrilhchhawngin, a ni hian Maubawk YMA a hriattir a ni. Police-te nen endik nghal niin, a ruang hi harsa tak chungin tuilian karah Maubawk YMA hian Inrinni zan dar 10 rik dawn tep khan an lachhuak fel thei a ni. A taksa a puam deuh tawh a, a hmel leh pianhmang hriat a harsa deuh tawh chungin, mipa a ni tih hriat a nih bakah Zohnahthlak ni ngeia ngaih a ni. Thawmhnaw a inbel loa, a taksaah chhinchhiah theihna tur a awm loa, hliam langsar a nei lo bawk. Ruang hi Civil Hospital Aizawl Morgue House ah dahin, police-in tunge a nih tih an ngaihven zui mek zel a ni.
August 23 chawhma dar 11.00 vel khan Sairang Dinthar Veng huamchhung, Changsilkai bula mimal huan thlamah hnamdang, Hemran-a @ Tlangvaltea chu a ruang hmuh a ni a, hliam a tawrh dan atangin kut tuar ni ngeia ngaih a ni. Amah hi kawng siama Mizorama rawn lut, cham hlen ta, kum 30 chuang awm tawh niin, Sairangah hian thla 3/4 kalta vela he thlamah hian khawsa nia sawi a ni.
Hmun thumah ruang hmu
