An sawrkar hnuaia hna an lakah sawipuitu hran neih a ngai loa, an thiamna chu anmahni sawipuitu a ni tiin chief minister Lalduhoma chuan a sawi.Hmar Students’ Association chuan Zirtawpni khan Kolasib district Saipum-ah general assembly vawi 60-na neih pahin Sikpui Ruoi an hmang a. Hmanpuitu chief minsiter chuan, kum hnih chhung lekin sawrkarin hnaruak tam tak a hnawh khat a, hna thar an siam a, MPSC calendar a khat hle reng tih a sawi. “Hna kan lakna reng reng dik leh thianghlim takin kan kalpui zel a. Tu tan mah sawipuitu hran neih a ngai lo, an thiamna kha anmahni sawipuitu tha ber a ni,” a ti.
Mizoram Engineering College chu kum thar atanga class tantir an tum a. State University din turin chak takin an kal a. Kum rei tak chawlhsan tawh NIT Mizoram campus harsatna an chinfel sak tih a sawi. Sawrkar hnathawh tum lo, mahni kea din tum tan Bana Kaih Scheme an kalpui a. Duhsak bik nei loin an project that dana tehin a pung awm lo loan an pe a, guarantor-ah sawrkar a tang tih a sawi a ni.
Lo neia eizawngte tan thlai thar pangaah support price tha tak an pe a. Kuminah pawh khaw tam takin support price zarah sum an lalut hnem em em a. A rate hresa in thlai an ching thei ta a. An thawhchhuah tam leh an hlawk tihna a nih thu a sawi bawk.
“Chutianga kan ram hi a kal tak avangin thalai taima leh tumruh tan hlawhtlin theihna remchang a tam em em ni,” a ti.
Mizo hnam zingah Hmar chu a lian ber pawl an nih avangin u chan chang thiam a, Zohnahthlak zingah a lian ber leh khaipa ber an nih ang ngeiin Zofate inpumkhatna ngaipawimawh a, inpumkhatna fatu-ah tang zel turin a chah.
HSA inkhawmpuiah hian Assembly speaker Lalbiakzama leh IPR,P&S minister B Lalchhanzova te an tel bawk.
Hmar Students Association hi kum 1939-a Imphal-a din a ni a. Tuithaphai Manipur-ah Gen Hqrs. a awm a, state hrang hrangah Joint Hqrs. 13 leh branch 6 awmin, unit thahnem tak a nei.
Hna kan lakin sawipuitu an ngai lo: – Chief minister
