Sawrkar hna lak dan pangngai loa lut CSS hmanga sawrkara thawkte chu dah ngheh theih an ni loa, dan dika lut erawh CSS Regularisation Scheme hmanga dah ngheh theih an ni tih chief secretary in-charge H Lalengmawia chuan a sawi a. Thil phut theia nuar mek CSS employee-te chu tha taka thawk zui turin a ngen tih a sawi. Chief secretary awm loh vanga a aiawh mektu secretary H Lalengmawia chuan centrally sponsored scheme kaltlanga Mizoram sawrkara thawkte hi department thenkhatah chuan post awm dan azir leh an sawrkar lo intiamkam tawhna anga dah ngheh (absorp) an lo awm tawh a. Sawrkar chuan CSS hnuaia thawk department dang amite pawh an chungchang entel tul tiin kum 2021 khan Study Group a din ta tih a sawi.
Study Group zirchiannaah department 16-ah CSS hnuaia thawktu 10654 an awm a; RUSA hnuaia lecturer-te tih loh chu state sawrkarin ama sum senga chhawr zui turin ‘binding terms & conditions’ a awm lo tih a zirchhuah bakah CSS employee zinga regular taka chhawrte hamthatna engemaw neih ve awm a tih thu pawh sawi tel a ni.
Hemi ang hian an hamthatna dawn theih dan tur duan chhoh hret hret niin, court judgement hrang hrang leh India danpui entel chungin CSS Employees Regularisation Scheme 2023 hi buatsaih a ni ta tih a sawi.
“He scheme hi dan pangngaia lak – advertisement chhuah emaw DPC/DCS emaw lak, kum dik leh thiamna dik tak nei leh kum over loah hman theih a ni a. Chutihlaiin regularisation quota bituk sa a awm loh avangin sawrkarin tul a tih hunah, state sum dinhmun leh hna awm zat chhut hmasa chungin a la thei a; CSS awm lo pawh nise sawrkarin hna a lak ngei ngei ngai ang chi a huam a ni,” H Lalengmawia hian a ti.
CSS hnuaia thawkte dah ngheh chungchangah Supreme Court order a awm nual a; Article 14 & 16 bawhchhiat theih a ni lo bawk tih sawiin, Regularisation Scheme-in lak theih a tihin a huamte bak chu, hun rei tak thawk tawh pawh nise, sawrkarin a la nghet thei lo tih a sawi a ni.
Tuna lungawiloh lantir zingah CSS hnuaia thawk zawng zawng an tel lo niin, chief secretary in-charge hian zawhna a chhang a. Sawrkar hmasa lam daihah pawh tuna an thil ngen hi an lo ngen tawh a, tun thlengin an la hmu thei loa, tun sawrkarin an kum khatnaah sum dinhmun that loh vangin ‘insawhngheh kum’ a puang a, insawhngheh kum chu kan hmang zo a, sawrkar kum pangngai kan hman tan chauh avangin inchinfel ngaihna a la awm lo tih a sawi a ni.
“Khawngaih takin nawrh chhunzawm lo turin ka ngen a. Boruak a sosang chho zel a nih erawh chuan ‘no work no pay’ chauh lo pawhin sawrkarin a tih tur a tih a ngai dawn a ni,” a ti.
CS in-charge thusawi:
8 CSS hnuaia lak tam tak hi dik lo/ mumal lo taka lak an ni. Advertisement a awm loa, DPC kaltlanga lak a ni lo bawk. Recruitment mumal taka open competition kaltlanga lak ni lo, induhsakna avanga hna inpek ang kha a tam a. Hetiang tan hian tuna CSS Regularisation Scheme hi a hman theih loh.
8 Lak dan mumala lak ni lo zawng hi chu ‘illegal’ leh ‘irregular’ appointment vek an ni tihna a ni.
8 Mumal lo taka lakte hian seniority pawh an nei hleithei lo a; NHM leh SSA employee zingah hetiang i an tam zual niin a lang. Regularisation kalpui tura thil tul leh pawimawh tak, inter-seniority tih fel pawh a har hle niin a lang.
8 CSS Regularisation Scheme-in a phut ang neih vek bakah dan pangngai anga hna lak zingah CSS hnuai ami dahngheh an awm tawh.
8 CSS kaltlanga lak zingah kum 30 chuang thawk tawh pawh an awm.
Hna lak dan pangngai loa lut CSS-a thawkte nghet thei lo
