Arab rama hna thawk tura inthawn chungchangah chief minister Lalduhoma’n dan felhlel vang nia a sawi laiin, hna thawk tura kum la tling lo thawntu agenct-te dan bawhchhiatna erawh a sawi tel duh lo tih Congress Thalai chuan sawiin, agency-te hum tum anga a tawng chu ‘rule of law’ rahbeh tumna nia an hria thu an sawi.
Congress Thalai hruaitute chuan, chief minister hian Mizoram Private Placement Agencies (Regulation) Act 2015 chu a felhlel, a bilha tho lo, tia sawiin, agency-te thiam loh a ni bik loa, an sual vang a ni lo, ti zawnga kawih her a tum tlat niin an sawi a. “He dana Mizoram pawn a huap avanga dikhlel anga a sawi hi a dik loa, Mizoram pawnah placement agency-te hian placement an tih theih ngei a ngai zawk a, Mizoram pawna placement an tih theih nan – ‘Beyond the boundaries of Mizoram’ tiin Mizoram sawrkarin dan a lo siam a ni a. Chutih lai chuan India ram pawn, foreign-a hna thawktu tur thawn chhuak a, placement tih chungchang erawh sawrkar laipui thu a ni a. Mizoram sawrkarin thuneihna a nei loa, dan pawh a siam thei lo,” an ti.
He dan Section 8, Sub-section (3) ah chuan hmeichhia, kum 18 tling lo hna thawka thawnchhuah khap tlat a ni, tih a nih laiin, hmeichhe kum 18 pawh tlinglo Dubai-a thawntu agency-te chuan he dan hi an bawhchhe ngei a. Hei bakah hian midang passport hmanga an kaltir lehzel hi dan bawhchhiatna thuk tak, mihring hmanga sumdawnna a nih tel avangin a case hi a serious hle tih an sawi.
Hmeichhe naupang pahnih, Dubai jail-a thla 7 an tantirte tirtu agency-te khan dan an bawhchhe ngei a. A hremna pawh Mizoram Private Placement Agencies (Regulation) Act 2015 Section 9, Sub-section (2) ah chuangin, section 8 dan bawhchhiate hremna chu, kum thum thleng lung ina khung emaw Rs. 50000 thleng chawitir emaw, a pahnih pawha hrem theih a ni. He dan Section 14 ah pawh he dan an bawhchhia a nih chuan ‘offence to be cognizable and non-bailable’ a ni tih an sawi bawk.
“Hetiang a nih laia CM berin a fa anga a en tur hmeichhe naupangte, tanpui ngai em emte pawh ngaituah loa, dan bawhchhiaa kum tlinglo, dan bawhchhiaa Dubai-a thawntute tan zawk anga lang a, an thlavang rem leh rem loa a hauhsak hi a dik loa, anmahni hum tum anga a tawng hi dikna (rule of law) rahbeh tumna ni ngeiin kan hria,” Congress Thalai hruaitute chuan an ti a. Dan bawhchhetute nen hian inzawmna thuk tak an lo nei em ni, tiin an zawt a ni.
Hna thawk tura kum tling lo thawntu agency hian dan a bawhchhe ngei – Congress Thalai
