Hnahthial College-ah
Literary Festival
Govt Hnahthial College Literary Festival 2025 ni khatna chu Nilaini khan Hnahthial bawrhsap Rita Lalnunmawii Pachuau chuan a hmanpui a. “Mizo History leh Sailo Lal Ropuite: Vandula leh Ropuiliani” lehkhabu chungchang research team hnen atanga ngaihthlak niin, Mizo Academy of Letters Book of the Year 2023 – Pangparhnima ziaktu, Ahmangaihi Khiangte kawm a ni bawk.
Bawrhsap chuan tunlai, lehkhabu chhiartu tlakhniamna khawvelah ziak leh chhiar tuaithar leh tura Literary Festival buatsaih a ni leh a buatsaihtu Literature Club din a ni chu lawmawm a tih thu a sawi a. Ziakmi kalkhawmte chu a hlut takzet tih sawiin, Lalnu Ropuiliani chungchang research neih a ni chu lawmawm a tih thu a sawi a ni.
‘Mizo History leh Sailo lal Ropuite: Vandula leh Ropuiliani’ chungchang ziaktute, research team member – Mizoram University Department of History asst. professor Dr Laithangpuii, MZU research assistant pahnih – Laltlanthanga Pautu leh Zirnuntluanga bakah Exodus Research Consultancy chairman Alfred Zothansanga Sailo ten thu an sawi a, sawiho zui a ni.
GHC Literary Festival hi Literature Club, Department of English leh Mizo tangdun buatsaih niin, Club din tirh, kum 2023 atangin Festival hi buatsaih thin a ni a. Kumin Literary Festival hi ni hnih awh tur niin a ni hnihna hi vawiin, February 6 hian neih a ni ang.
Hnahthial College-ah Literary Festival
