Khum 50 awm theihna tur, Hnahthial District Hospital chu Health & Family Welfare minister Lalrinpuii chuan Nilaini khan a tlawh a. Hospital sak hna thawktu, North East Consultancy Services (NECS) chu an hun tiam, kumin December chhung ngeia sa zo hman turin a hrilh.
Minister hian District Hospital-a hmalakna bakah mamawh awmte bawrhsap K Vanlalruati, senior CMO Dr Lalnunziri leh medical superintendent Dr Zosangliani te nen an sawiho a. Hospital-a thawktu indaih lohna chu a hriatpui tih sawiin, an indaihlohna phuhruk turin theihtawp chhuah a ni tih a sawi.
NECS hotute report danin, hospital structure hi zaa 70 vel zawh a ni tawh a; Type-III quarters chu a vaiin zaa 70 vel sak zawh a ni tawh. Type-IV quarters erawh hmanrua dahna tur tha a awm loh avangin duh angin an la thawk thei lo niin an sawi.
Minister hian District Hospital sak mek bakah building hrang hrang hi a endik a. NECS chu rinawm leh hmantlak ngeia sa tura hrilhin, hospital chu hun tiam chhunga sa zo hman ngei turin a hrilh. Hmanraw dahna tur awm loh avanga Type-IV quarters sak zawm theih loh chu a vei tih sawiin, hospital hmunhma a enfiah hnuah hmun awl deuh lai chu hmanraw dahna atan lo hmang turin NECS hi a hrilh a ni.
Khum 50 awm tur District Hospital Hnahthial bakah Type-III leh Type-IV quarters hi North East Special Infrastructure Development Scheme (NESIDS) hnuaia sak niin, cheng vaibelchhe 16 ruahman a ni. NECS hian August 2024 atang khan hna tanin, kumin December 25-a zo hman tura tih a ni. NECS hnuaia thawktute hian hnathawktu tur mumal an hmuh thin loh avangin hna a muan phah thin niin an sawi a. Tunah hian thawktu 46 an awm mek niin a sawi.
Hnahthial damdawi in an hun tiama zo turin minister-in a satu NECS hrilh
