Hnahthial District MLA Cup champion
Cherhlun Branch YMA
Karliamta Inrinni khan Hnahthial District Football Association (HDFA) turf ground-ah Hnahthial District MLA Cup Inter Branch YMA Football Tournament 2025 zawh fel niin, final-a 3-2-a Electric Branch YMA hnehtu Cherhlun Branch YMA an champion.
Champion team hian bawng chal bakah trophy leh pawisa fai cheng sing sarih (Rs.70,000) dawngin, pahnihna kutah pawisa fai cheng sing li (Rs. 40,000) leh medal an dawng a; semi-finalist team pahnih Peniel leh Chanmari Branch YMA chuan pawisa fai cheng sing khat (Rs.10,000) ve ve an dawng bawk.
Hei bakah hian mimal lawmman dawngte’n trophy leh pawisa fai cheng sangkhat (Rs. 1,000) theuh an hum haw a ni.
Final-a man of the match-ah Aaron Vanlalrinchhana, Cherhlun Branch YMA thlan niin, tournament chhunga goal riat khung tling Lalrintluanga, Electric Branch YMA chu top scorer a ni a; best goalkeeper-ah Cherhlun goal-veng Robin Chawngthanzuala thlan niin, tournament pumpuia thiam ber lawmman best player trophy dawngtu chu Lalthankhuma, Cherhlun Branch YMA a ni.
Best fans atan Peniel Branch YMA tantute thlan an ni a; fair play award dawngtute chu Cherhlun khaw thenawm Thingsai Branch YMA an ni thung.
Inrinnia he tournament kharna programme hi YMA president Hmingthanzuala’n kaihruaiin, sports minister Lalnghinghlova Hmar chuan khuallian niin a hmanpui.
Minister hi deputy speaker Lalfamkima; adviser to CM H. Ginzalala leh Dr. Lorraine Lalpekliana Chinzahte bakah MLA Jeje Lalpekhlua leh T. Lalhlimpuiate’n an tawiawm.
Sports minister hian Hnahthiala hockey ground leh boxing hall sak a nih tur thu sawiin, deputy speaker-in tournament huaihawttu HDFA football panga leh pawisa fai cheng singkhat (Rs. 10,000) a hlan ve bawk.
Khuallian chuan ram pum huapa infiammi tha tak tak lo chherchhuak tawh Hnahthial district-a football tournament kharna hun a hmanpui thei lawmawm a tih thu sawiin, Hnahthial district tan hmachhawp tam tak an neih thu a sawi a; India ramin kum 2036-ah Olympics thlen a tum thu a tarlan rualin Mizo infiammite an tel ve ngei theihna tur sport atan hockey chu thlan a nih thu a sawi.
Politician chuan hockey ground siam tum a nih thu leh Hnahthial chu a siamna hmun tur atana thlan a nih thu a tarlan rualin tun dinhmunah hockey ground sakna tur hmunhma ngaihtuah mek a nih thu a sawi a, a sakna tur atan cheng vaibelchhe 9 leh nuai 88 (Rs. 9.88 crores) dahthat a nih tawh thu a tarlang bawk.
Hnahthial chu infiamna lama hma a lo sawn belh zel theihna’n hockey ground mai bakah HDFA turf ground bulah bialtu MLA fund nen tangkawpin boxing ring dahna tur hall sak a nih tur thu a tarlang tel.
Minister chuan Hnahthial chu infiamna lamah hma an sawn ang bawkin zirna lamah hma sawn thei se a duh thu sawiin, mipuite chu tangrualin kawng engkima hma sawn zel turin a fuih.
Bialtu MLA Jeje Lalpekhlua pawhin buaina lian tham awm loa MLA Cup final an thleng thei chu lawmawm a tih thu a sawi a; infiamnain ken tel a neih chu insumtheihna a nih thu sawiin, infiamna chu damdawi tha tak niin a sawi a, tun tournament hlawtlinna’na hma latu zawng zawngte chungah lawmthu sawiin, eng kawngah pawh Hnahthial district chu entawntlak ni thei tura tan la turin district mipuite a chah.
Final match khelh tan hma hian minister Lalnghinglova Hmar leh MLA Jeje Lalpekhlua team-in exhibition match an khel.
Hnahthial District MLA Cup championCherhlun Branch YMA
