Hnahthial RD Block chuan Zirtawpni khan a kum 60 tlin a lawm a, hemi ruala kumin June thlaa sak zawh Hnahthial DRDO Office chu hawn nghal a ni.
He hun hmanpuitu Rural Development minister Lalruatkima chuan state sawrkarin mahni sum intum chawpin DRDO office a kalpui a ngai tih sawiin, district hrang hrangah DRDA office thawktu awmsa te chu a theih ang anga pawhluh an nih thu a sawi. District thar pathum zingah Khawzawl leh Saituala DRDO hawn a nih hnu ah Hnahthial DRDO hawn a ni chu lawmawm a tih thu a sawi.
A department enkawl pathum zingah Hnahthial district tana revenue lam hma la turin settlement officer leh surveyor-I dah a nih thu leh an an hna pawh an zawm tawh thu Lalruatkima hian a sawi a. ASO leh surveyor dah belh turin ruahman zel a nih thu te, sawrkar thu leh hla puangzara DC-te tawiawm turin District IPRO pawh dah a nih tawh thu a sawi.
RD department chu mipui rinchhan leh innghahna department a nih angin khawtlang mipui leh pawl hrang hrang, kohhran pawhin an pan rawn a ni, tiin, department hnathawktute chu rawngbawlna thinlung pu turin minister hian a fuih.
Hnahthial DRDO office building hi cheng nuai 169.68 hmanga sak niin, 2021 September 11 khan hna tan a ni a, kumin June 24 khan zawh a ni.
Hnahthial RD Block in kum 60 tlin lawm
