Swachh Bharat Mission sum, nuai 42 senga sak Hnahthial District Laboratory, PHED Hnahthial WATSAN Division chu Inrinni khan PHE engineer -in- chief Lalrothanga’n a hawng a. Hnahthial chawm tura tui lakna – Tuichang Pumping Station leh Hnahthial khawchhunga AMRUT sum nuai 84 senga reservoir siamthar pahnih chu a hmunah enfiahin thawktute nen an inkawm bawk.
Hnahthial district mipuiin tui thianghlim an in theihna tura Hnahthiala laboratory building thar hawn a ni chu lawmawm a tih thu leh Hnahthial-in rahbi thar a kai nia a hriat thu Er Lalrothanga hian sawiin, “Tui kan buaipuiin tui tam kan duh a, tui tam mai bakah a quality kan buaipui chho a, chak taka hma lak kan tum a ni,” a ti. International standard-a kalpui an tum thu a sawi a, tunhnaiah E-in-C office atangin laboratory-a thawk tur mi 24 lakna ruahman a ni tih a sawi.
Hnahthialah hian kum 2011 atangin PHED laboratory hi kalpui tan niin, mimal building luahin an awm a. PHED-in tui an semchhuah tur hi chawlhkar khatah vawi hnih an test ziah a, tuikhur leh mimal tuizem ami chu a khat tawkin an test thin bawk. Tun dinhmunah chemist pakhat hoin thawktu dang pahnih an awm.
Hnahthialah PHED lab hawng
