Mizo hnam a ral lohna turin tam a ngai a, kan theih anga tam fa neih a ngai tih MLA Lalmuanpuia Punte chuan a sawi.
Lawngtlai district Hmawngbu-a Mizoram Bawm Students’ Association (MBSA) Conference 2024 a hmanpuinaah adviser to chief minister (Political) Lalmuanpuia Punte chuan, Bawm hnam bitna chu insumdawn tawnna kawngpui bul maia awm a nih avangin hmang tangkai a, sumdawnnaa tel phak a, tirhkaha tang mai mai lo tura inbuatsaihin, a hlawkna tel phaka inbuatsaih a ngai tih a sawi.
“Development hian hnam a tiral foa, chumi laka kan inven theih nan inbuatsaih a tul. Kan tam ve a ngai a, fa pawh kan theih anga tam neih a ngai. Mizo hnam hrang hrang hi kan tanrual a, kan inhlawmkhawm that chuan hnam ropui takah kan insiam thei ang,” a ti.
Zohnahthlak hnam ho chu hrang angin lang mah ila, kan chi peng sawi danah kan hrang tak tak loa, kan inawmpawlh vek tih Lalmuanpuia Punte hian a sawi. “A chi peng angin sawi dan kan nei vek. Mizo vek kan ni a, tumahin kan nihna hi kan zahpui tur a ni lo. Mahni hnam leh zia zahpui loh tur, kan zahpui chuan kan hnam a ral dawn tihna a ni mai,” a ti.
Aizawlah Bawm Students’ hostel neih a nih theih nan theihtawp chhuahpui a tum thu a sawi bakah Mizoram Schedule Tribe list hi siamthat tum mekah MZP rawtna siam zulzuiin kan zavaia kan tel theih dan ngaihtuah a ni dawn tih a sawi a ni.
Hmawngbu leh a chhehvela Bangladesh atanga raltlan inbenbelna hmun chu adviser to CM hian a tlawh nghal a. An dinhmun leh sawrkarin a tih theih tur ngaihvenin a hmunah an harsatna a en.
Hnam a ral loh nan tam a ngai – Lalmuanpuia Punte
