Bilkhawthlir Kualmawi branch YMA chuan sawrkar sum tel lo leh hnam dang mistiri tel loin hall an sa a. Tun hnaia he hall hawngtu Central YMA president chuan sawrkar sum tel lo leh Vai mistiri tel loa hall an sa thei chu hlu leh ropui a tih thu a sawi a.
Hnam dang mistiri tel lova hall sak theih hi, hlu leh ropui kan tih viau ruala thil lo lang chu: ‘Hnam dangte hian a ram leilung fate tih ve theih reng si hi an thawk nasa’ tih hi a ni awm e. He thu tawi tê hi a sei hle a, hemi chungchang hi he lai hmun zim têa sawi chipchiar viau theih pawh a ni lo; kan hrethiam tlang vek ang.
Vai cement mistiri te hian Mizo mipuite hi min bawl rei ta viau mai. Min bawl dan hi keimahni zawk hian kan lawm a, kan sawi a, kan nui thler duai duai, han ti ila, kan duhthawh lutuk mai thei e!
State thenawm atangin an lo lut a, eng certificate mah an rawn keng lo, cement mistiri an nih thu an sawi a, kan lo ring mai zel. Tichuan kan han ruai ta a, helper engemaw zat an nei a, an hotupa ber Vai mistiri chuan a helper-te chu tih dan a zirtir pah zel a. Helper-te hian building pakhat an sak chhungin a tlangpui chu an hre ve nial nual hman mai a. An hotupa ber chuan midang, Mizo pa hnenah a va hruai a, ‘hei hi cement mistiri a ni, a fel, ruai rawh’ a han ti a. Mizopa chuan a ruai ve leh mai a. An hotupa chuan a pawimawh zual, foundation etc. vel chu a rawn tihpui (enpui) zawk zawk a, a rawn chhawmdawl a nih chu. Helper atanga mistiri lo ni ta chuan helper dang a han nei ve leh a, building pakhat an sak zawh hnuah chu helper chu hmun dangah chuan ‘mistiri’ a lo ni ve leh ta mai. Hetianga an inzirtir chhawn hian, mistiri te hian an chher chhuah helper-te lakah commission an nei zui ve zel a ni awm e. Mizopa building an sakna apiang kha ‘Vai Mistiri Training Center” a lo ni ta zel mai a nih chu.
“Hnam dang mistiri an fel zawk, vin hrep pawhin an haw ve lo, zial zuk chawlh an nei lo, an kal tlai lo, an inthlah dah ve lo, bla bla…” tih vel hi mi tam takin Mizo mistiri an rawih duh loh chhan a ni thin. Kan hnathawkte hi vin hrep tur emaw kan ti thin nge ni? He laiah hi chuan a chhawrtuten an mi chhawrte hnenah an duh dan an sawi lawk mai tur niawm tak a ni.
A ram leilung fate hian, kan thawh ve theih reng si hnam dangten an rawn thawk tur hi i phal lovang u. ‘I phal lovang u’ tih hian, hnam dangte nekchepna emaw, hnam dang hnathawk tur lo dan lam a kawk lova, an thawh ai lo thawk suau suau thei zel ila, Mizoramah chuan hna a tam na a, anmahni’n an thawk zel a, thawh tur kan chang ve lo’ an tih tur khawpin inchher sauh sauh ang u, tihna lam zawk a ni.
Hnam dang mistiri leh a behbawm
