Nupui pasal atana hnam dang nei, inthlanpui lo awm
tura candidate an awm a nih chuan MZP-in an tlin loh nan hmalak an tum a, an tlin loh dan tur hi ngaihtuah an tum.
Tuna lang chiang chinah Congress party-in hnam dang nei hi candidate an nei dawn a, MZP hruaitute chuan an dinna ngaiah an din thu leh, hnam tan him lova an hriat avanga theihtawp chhuah an tum thu an sawi.
“Kan dinna ngaiah kan ding a, kan dinna hi kan thlak kan ring lo,” MZP president H Lalthianghlima chuan a ti a, “Zofate him nan a theih ang anga hmalak kan tum ang,” a ti bawk.
MZP chuan hnam dang nena inneih pawlh loh an duh tih a sawi a, chu chu nationalist-te duh dan a ni tia sawiin, hemi chungchangah hian MZP-in hma a lo lak tawh thin thu leh, zirlaite pawh hnam dang nei lo tura an zirtir thin thu te a sawi. Hnam dang nei hi MLA te ni ta se, inneih pawlh chungchang a nghawng ang tih an hlau a, thalaite’n an pawisak loh phah ang tih an hlauh thu te a sawi bawk.
Mimala inmil lohna lam leh tute emaw mimala an dodalna a nih loh thu te a sawi a, hnam himna tura hmalakna a nih thu sawiin, hemi chungchangah hian Zoram mipui tanrual a tul thu a sawi.
“Hma kan la ang a, mahse kan hmalak dan tur hi sawi tur a la awm lo a. Kan ngaihtuah chawp ang. Hma chu kan la ang,” Thianga chuan a ti.
MZP hian political party hrang hrangte hnenah hnam dang neite candidate lo turin an lo ngen tawh a, ziakin an lo thlen tawh. Hnam dang nei candidate an awm a nih chuan an tlin loh nana hmalak an tum a, hei pawh hi an lo puangzar tawh.
Hnam dang nei candidate tlin loh dan tur ngaihtuah dawn
