Inthlanpui lo awm turah hnam dang pasal nei candi
date an awm a nih chuan MZP-in dodal an tum a, political party-te pawh hnam dang pasal nei candidate lo turin an lo ngen tawh.
“Hnam dang pasal nei candidate an awm a nih chuan theihtawpa dodal kan tum a, kan dodal dan tur tak hi chu ngaihtuah chawp turah kan dah,” MZP president Lalnunmawia Pautu chuan a ti.
Hnam dang pasal nei candidate an awm a nih chuan lungawi lohna lantir ni se tia an rel tawh thu a sawi a, vote lo tura mipui ngen an tum thu a sawi bawk.
He thil hi hnam himna atana ti an nih thu a sawi a, “Kan la tlem a, hnam dang nena inneih pawlh hi tha kan ti lo. Europe-ah pawi an ti lo a nih pawhin keini chuan tha kan ti lo. Mizo leh Mizo ngei inneih hi a him a, kan hnam tan tha kan ti,” a ti.
Hnam dang pasal neih chungchangah pawi ti lo an awm thu leh, pawi ti lo hi an pung em ni tih theih a nih thu a sawi a, “MLA candidate te ni ta se, MLA te ni hial ta se, hnam dang nena inneih pawlh hi pawi kan ti lo zual zel thei a, chu chu hnam tan a him lo a ni,” a ti a, “Kan tan tlan a ngai a, kan fimkhur a ngai. Mi pahnih khat MLA candidate an nih hian thangthar zelah hnam dang nena inneih pawlh pawi tih lohna a hring thei,” a ti bawk.
Lalnunmawia Pautu chuan mimal leh political party tih bik an neih loh thu a sawi a, tun hnaia an buaipui thar a nih loh thu a sawi bawk.
Hnam dang neih loh hi MZP-in thalaite hnena a sawi fo a nih thu a sawi a, kum tin September ni 2-ah hnam dang nupui pasala nei lo tura inzirtirna ni atan an hmang thin tih a sawi.
Hnam dang pasal nei candidate dodal tum
