Hnam himna tiderthawng thei
eizawnna hnar ngam turin chah
Mizo hnam himna leh inlungrualna tiderthawng thei eizawnna chu hnar ngam turin minister Lalrinawma chuan mipui a chah.
Chhingchhip Venghluna neih Sub-Headquarters YMA Serchhip Inkhawmpui vawi 7-na vantlang inkhawm Nilainia neih a hmanpuinaah Tuikum bialtu MLA, minister Er Lalrinawma chuan tunlaiah eizawnna chi hrang hrang kan dap kual nasa chu kan tih tur a nih rualin, kan eizawnna thlan chu kan hnam himna leh inlungrualna tiderthawng thei chi a nih chuan hnar ngam turin Mizo mipui a chah.
“He hnam, he chi hi a ral chuan nang leh kei hi kan damchhuakin kan ding chang bik thei dawn chuang lo. Kan hnaivaia hnathawh tur awm remchang kan dap thiam a tul hle a, kan kawtkaiah ngei hnam dangten eizawnna tha tak tak an thawh reng laiin thawh tur zawngin kei hi ka lo hawihai reng em tih inzawt ang u. Kan ei hmuhna a nih phawt chuan eng hna mah hi hnuaihnung bik a awm loa, kan sira thawh mai theih hnate iai loa kan thawh mai hian kan ram leh hnam kan humhalh tel nghal a ni,” a ti.
Mizo hnam a ral mai loh nan fa neih tam uar a tul tih Er Lalrinawma hian sawiin, mi tam takin ei leh bar harsatna chhuanlamin fa ngah hreh thin mah se, chawm tur kan pungah ngai lo in, thawktu tur kan pung zelah ngai zawk turin a chah.
Sub Hqrs YMA Serchhip hnuaiah hian thuthmun branch 28 leh Group YMA pathum – Tuichangral South, Tawitlang leh Vantawng an awm a, heng Group hnuaia branch 46 awm nen, an vaiin branch 74 an awm a, member 38154 an awm a ni.
Hnam himna tiderthawng thei eizawnna hnar ngam turin chah
