Mizo hnam leh sakhua venghim turin MNF baka tha political party dang an awm lo tih MLA Prof F Lalnunmawia chuan a sawi.
Thawhtanni MNF office-a inkhawmah MNF adviser ni bawk Prof F Lalnunmawia chuan MNF sawrkar leh hruaituten famkim tawk lohna an neih theih rualin, Mizo hnam leh sakhua venghim tur chuan zalenna sual ngam MNF baka tha party dang an awm lo, tiin, “Mizo hnam lungphuma innghat MNF hi Mizorama nationalist party awmchhun a ni a, a din atangin kum 60 liam tawh mah se, a te tak tak thei loa, a ral mai hek loang,” a ti.
MNF sawrkarin CAB/CAA theihtawpin a lo do tawh tih a sawi a. CAB duh loh thu Assembly Session ah pass a nih bakah chief minister Pu Zoramthanga’n hmaichhanah CAB duh loh thu Union Home minister a hrilh a, Mizoram MP pahnihin he bill an duh loh thu an auchhuah pui bawk a. Tichuan, tribal-te chenna NE state-te chu exempt kan ni ta a, he dan hian min huam ve ta lo, tiin a sawi.
Uniform Civil Code (UCC) do tur pawhin Mizoram political party zingah MNF baka tha an awm lo tih pawh MNF MLA hian sawiin, “Kumin Assembly Session February 14 khan kan duh loh thu kan pass tawh a. Kan CM, MNF president ni bawk chuan sawrkar laipuiah UCC kan duh loh thu ziakin a thlen a. Kan MP pahnihin UCC an dodal thu an auchhuahpui mek bawk. Hetiang taka Mizoram leh Mizote himna atana tang ngam leh a tul huna sawrkar laipui dodal ngam MNF ang hi party dang an awm lo,” a ti.
MLA inthlan turah MNF chuan sawrkar chhunzawm leh tura chance a neih that thu a sawi a. Tun dinhmunah Mizorama party ruhrel lian ber a nih bakah an khingpui opposition-ten sawrkar beihna tur issue liantham an nei loa, NGO-te sawrkar laka lungawilohna liantham nei an awm loa, an party chhungkuaah buaina leh innghirnghona an neih loh bakah an party headquarter hruaitu lungawilo leh chhuak tau an awm lo te chuan an dinhmun a titha hle niin a sawi bawk.
Hnam leh sakhua venghim turin MNF a tha ber – Prof Lalnunmawia
