Hnam pual hoin 8th Schedule-a Mizo tawng dah tha an titlang: – Study Group

Chief minister Lalduhoma chuan Mizo Language Development Board hnuaia din Eight Schedules Study Group chu Ningani khan a kawm a, an hmalakna a thlirpui.Hun reilote chhunga tha taka hma an lak avangin chief minister hian Mlawmthu a hrilh a. A umzui zel dan tur an rawtna pawh tha a tih thu hrilhin, bawhzui a nih tur thu a sawi.
Eight Schedules Study Group hian Mizorama pawl leh hnam pual ho kawmkualin 8th Schedule-a Mizo tawng thun chungchanga an ngaihdan a zawt a. An kawm tawh zawng zawngin Mizo tawng 8th Schedules-a dah hi tha an ti tlang tih an sawi a ni.
Mizoram-in tunhma in dilna a lo thehlut tawh tih an sawi a, umzuina engmah a awm lo thung. Study Group hian Task Group din a, dilna hi a thara thehluh a, chak taka bawhzui thaa an ngaih thu chief minister hnenah hian an thlen a ni.
Mizo tawng hi kum 1974 khan state official language-a puan a ni tawh a. Khawvel ram hrang hranga Zohnahthlak inbiakpawhna a ni. Sahitya Academy chuan regional language-ah a pawm a, zirna lamah PhD thlenga zir theih a ni.
Peoples Linguistic Survey of India chuan Mizo tawng chu tawng thang chho mek a ni, tiin, UNESCO chuan khawvela tawng him a thliar hran zingah a him ber dawttu ‘vulnerable’ huangah a dah. Census hnuhnung ber, 2011 data-a tarlan danin, India ram state 26 leh UT 7-ah Mizo tawng hmang an cheng a, chhiarpui tharah chuan state zawng zawng a huam tawh rin a ni. Mizorama Mizo tawng hmangtu zat hi 2011 chhiarpuiah mi 830846 an ni a, chhiarpui tharah nasa taka a pun rin a ni. Zirtu thenkhat chuan, tunah hian khawvel pumah Mizo tawng hmangtu hi mi nuai 22 chuang an awm tawh niin an ngai.
Google translate chuan 2022 May 11 atang khan Mizo tawng chu tawng danga lehlin theihin a dah a. Hemi tum hian Google hian khawvela tawng chi hrang 1745 an zirchian zingah tawng 24 chu google translate-a dah turin an thlang a, Mizo tawng hi a tel pha a ni.
Mizo Language Development Board atang hian chairman R Lallianzuala leh secretary Lalsangpuia bakah 8th Schedules Study Group member – Dr Zoramdinthara leh Dr H Laldinmawia te an tel a. Study Group hian an report an la thehlut chiah loa, thehluh theihin an peih thawkhat tawh.