Zoremi Hmar Zote
Khawvel changkan ang zelin ram pawh a thang a, kan hruaitute pawh an fing ve tial tial niin a lang. Hruaitu fingin a hruai mipuite pawh kan pawimawh ve tho mai. Zirlaibu-ah hnam rilru putna tura zirtirna a awm a nih phawt chuan, in lamah pawh kan lo thlâwpin zirtirtute tàwiawm hna kan lo chhunzawm ve a va tha ve! Kan fate chuan eng ang pawhin lehkha thiamin zir sâng mah se, eng anga hna zahawm pawh thawk sawmthum mah se, hnam rilru pu-a hnam hmangaihna tak tak an neih loh chuan kan hnam hmêl a danglam dáwrh thei tlat a ni.
Kan pi leh pute khan, dikna leh huaisenna an hmachhuan a, riawmna chu an thisenah a bet tlat emaw tih mai turin kan hnam rohlu tam tak zinga a langsar ber pawl a ni bawk. Mahni intodelh chu a hranpaa an tum a ngai lo va, an nunphung pangngai a ni. Hmeithai leh pachhiate hnena khawngaihna leh lainatna lantir kha an nuna bet tlat a ni a, an thil tha tih an puangzâr láu lau ngai lo; hei hi kan hnam rilru chu a ni. Duhamna îtsikna a awm lo tawp bik chu a ni hauh lo na a, hminghliauna erawh a ni thung. Mahni tânghma chauh hâiin ro an rel ngai lo va, mahni hrawk aia a hnampùi hrawk ngai pawimawh thin chu Mizo hnam an ni.
Chawhmeh zuar ka ni emaw, sa sât ka ni emaw, contractor emaw, sawrkar hna thawk emaw pawh ni rawh i, hnam rilru pu chungin engkim ti ila, kan neihchhun kan ram leh hnam hi midang kuta dah chi a ni lo, nang leh keiin vawiina kan siam tur a ni. Tute pawh mai hian, hnam feeling hi tina hlur mai teh ang u; chumi avang chuan tute emaw va hmuh mawh a, thil tha lo chhuak thei zawnga kal fawr lutuk tur tihna lam a ni lo, kan nitin nunah, kan awmna apianga kan thil tih apiang kha, ka hnam, Mizo hnam tan a ni tih hre reng ang u.
Khai le, in chhûng atangin tan ang aw. Kan hnam chanchin naupang hrilh keuh keuh te, kan thenawm state leh ram dang chanchin te, kan hnam kan la tlêmzia leh zirna lama hmasawn kan mamawh nasatzia pawh, an nin loh tur tawk vela hrilh thiam fo a va tha dawn êm! Pi leh Pu ten lu chhum bân chhum huama an lo voh sa kan ram leh hnam humhalh a, veng him a, hmasawnna kawnga hruai zel tura an pawimawhzia sawi pahin an kutah han nghat rup mai ila, an mawhphurhna anga ngaia hnam rilru an thanlenpui ngei ngei theihna turin an thinlungah chi hmasa ber thehsak ila, a lo tiah a, a lo chawrno hunah ngaihngam takin kan fam thei dawn a ni.
Puitling hlei hlei ka pawimawh! Kan ram hruaitu lu ber atanga kohhran hruaitu, an va pawimawh êm! An hna thawhna kawngah tak mai khan ‘hnam rilru puin’ han thawk se la, thil a sual mawh viau ang. Tunah leh nakin zela kan ram leh hnam nghawng tur hna hi, vawiinah hian an thawk tih inhre rân se la, an thlah zelte hnenah eng ram leh hnam nge hnutchhiah an tum, phûl hmun ni sa rum rút mai, hahdamna tur awm lo nge, hmun hring nuam leh hahdamthlak, thlamuanpui em em tur kan hnutchhiah dawn tih hi, ngaihtuah fo tlâk a ni.
Hnam rilru pu, hnam hmangaih tlattu hruaitu ngah ram apiang an dingchang a, a ram mipui zingah hnam rilru pu an tam poh leh hruaitu an thlang tha mai. Kan tunlai boruak kan hre theuhin ka ring a, Myanmar ram chhung buaina chhan pawh khi hnam rilru pu lo, hruaitu leh Lal nih châk satliahin lal an hrawt vang a ni. Hnam rilru pu, hnam hmangaih tak taktu an rawn lang tùam túam a, sipai rorelna khi paihthlak a nih hunah chauh nun leh hun ralmuang an hmang ve thei chauh dawn tihna a ni a, an lainatawm tak meuh a ni. Nang leh kei erawh kan vannei e, democracy ramah kan nui súng a, kan duhthlanna ngeia kan thlan tlin hruaitute thlazàr hnuaiah kan awm a; nei le lu lo mah ila zalen zetin kan hawi hmelchhe thawveng ni tin thei bik a ni a, kan vannei a ni.