Sakhua leh hnam tana theihtawp chhuah a nih laia a nuihzat pawl kan awm thin chu a zahthlak tih Central YMA president Lalhmachhuana chuan a sawi.
Ningania Thingsulthliah Playground-a Zawlbuk Group YMA Sports Meet kharna a hmanpuinaah Central YMA president chuan vote chhiar hun sawn chungchangah Election Commission-in Pathiannia vote chhiar an titlu a, Mizote tan kan ni serh satliah ni lo, Pathian kan biakna ni, ringtute tan chuan kan ni pawimawh ber a nih avangin vote chhiar ni sawn turin an ngen a. A tul angin hma an la zel dawn a, NGO Coordination Committee thutkhawm pawh an nei dawn a, an thuchhuak lo ngaichang turin YMA member-te an inngen, tiin a sawi
“Tunlaiah kan sakhua leh kan hnam tana pawimawh NGO-in a buaipui laiin, hnam tana pawimawh ti lo leh kan hnam tana theihtawp chhuahtute nuihzat pawl kan awm hi a zahthlak a. A hunah chuan kan tanrual zel a ngai,” a ti.
Mizoram chu ram nuam tak, a chhunga chengte pawh inpawh tlang takin kan awmkhawm a. Mizoramin venghimtu a mamawh a, vengtu a neih loh chuan a nawmna, a ralmuanna hi a tluchhe mai ang tih a hlauhawm, tiin Lalhmachhuana hian a sawi a. Mizoram venghim turin YMA member-te an pawimawh a, YMA member tinin tih tur kan neihte theihtawp kan chhuah tlan a ngai tih a sawi. Ram leh hnam dinchhuah nan chuan nek ngai leh ke pen chhuah ngai a awm thin a, theihtawp chhuah tlan a ngai tih a sawi.
Mizoramah YMA hmelthar din an tum dawn a, YMA hmelthar kan hmuh theih nan tan lak tlan a ngai dawn tih Central YMA hruaitu hian a sawi. “Khawtlangah ramah YMA awm tawhna hmun apiangah chuan diklo nia kan hriat chu kan do ngam a ngai tawh, kan ram leh khawtlang a lo him theih nan tangrual zel ang u,” a ti.
Hnam tana theihtawp chhuahtu nuihzat pawl awm hi a zahthlak – CYMA president
