Education minister Lalchhandama Ralte chuan zirlaite’n hnam thinlung an put theihna turin zirna hi thui tak kalpui a nih thu leh, hemi atan hian ruahmanna a awm thu te a sawi.
Nilaini khan Budget Session neih mekah a demand sawihona hunah a hmawrbawkna hun hmangin Mizoram sorkarin zirna lama hma a lak dan a sawi a, “Zirlaite’n hnam thinlung an put theihna tur, Mizo nationalism an put theihna turin ruahmanna thui tak kan kalpui,” a ti.
2022-23 academic session atangin zirna inah ‘Ro min relsak ang che’ tih hla sak thin a nih thu a sawi a, pawl 6, 7 leh 8-ahte Zonun tih bu, Mizo hnam leh kan thlahtute ngaihsan theihna tur tih bu an zir tia sawiin, “He hnam hi hnam ropui a ni tih an hriat theihgna turin…” tiin, Zir Tirh Bu te, Number Bu te buatsaih leh a nih thu te a sawi bawk.
Pawl 9 leh 10-ah science leh mathematics te English leh Mizo tawnga zir theih tura buatsaih a nih thu a sawi a, hetiang hi state danga ti an la awm lo nia hriat a nih thu a sawi.
Myanmar atanga Zo hnahthlak raltlante chungchang a sawi a, raltlan naupang 6000 vel sikul kaltir an nih thu te, uniform, zirlaibu leh mid-day meal te pek an nih thu a sawi. Bangladesh atang pawhin Zo hnahthlak raltlan an awm thu a sawi a, an rawn luh hun a laklawh avangin sikul kaltir a remchan loh thu sawiin, “A la chamte chu zirna mumal pek kan tum,” tiin session tharah sikul kaltir tum an nih thu a sawi.
Mizo Language Board din mek a nih thu a sawi a, “Zo hnahthlak zawng zawngte min phuarkhawmtu tur” tiin he board hi a sawi.
Mizoram sorkarin zirna a ngaih pawimawh thu a sawi a, primary leh middle school-ah MR zirtirtu 817 leh 63, CSS hnuaiah primary-ah 107, middle-ah 130, high school-ah 159, higher secondary school-ah 208 lak a nih thu leh Hindi zirtirtu 826 lak a nih thu e, SEDP hnuaiah zirtirtu 3163 lak an nih thu te a sawi. “… in zirtirtu lak a fair lo tih kan tawng lo,” tiin lawmthu a sawi a ni.
Quality education a awm theih nan Mizoram School Standard Authority din tum a nih thu leh MBSE-ah cell hran a awm tawh thu te, hemi hnuaiah hian sikul hrang hrangte tan tehkhawng siam tum a nih thu te, peih tep a nih thu te a sawi a, khaw hmuh fiah lote leh mitdelte hman tur zirlaibu siam a nih thu te sawiin, MBSE syllabas chu CBSE syllabas nen level khat a nih thu te a sawi.
A department chan dang, Labour Employment Skill Development & Entrepreneurship (LESDE) Department chungchangah Lalchhandama Ralte chuan LESDE chu nakin lawkah department lian a la ni dawn tiin a sawi a, Mizoram sorkar sum hmang lovin directorate building tha tak sak a nih thu leh April-ah luah hman beisei a nih thu a sawi.
Lawbour law 18 hman a nih thu a sawi a, Building and Other Construction Workers’ Welfare Board hnuaiah kuthnathawktu mi 65079 an inziahluh thu leh kawng hrang hranga puih an nih thu sawiin, inkharkhip laiin chhungkaw tinte Rs 3000 theuh pek an nih thu te, buhfai a thlawna sem a nih thu te a sawi.
LESDE hnuaia Mizoram Youth Commission enkawl Super IAS 40 programme-ah Mizo thalai 40 chu Delhi-ah competitive exam atan zirtir an nih thu leh sorkarin a chawm thu te a sawi a, tun hnaia UPSC exam-a interview hmachhawn tur mi pahnihte pawh Delhi kal man leh Delhi-a an awm chhung senso te, an inzirna tur te ngaihtuahsak an nih thu a sawi.
LESDE hnuaia SEDP board Manpower Development Board hmalaknain Japan-ah nurse 20 an kal dawn tih a sawi a, India ram atanga nurse 50 kal turah Mizoramin 20 a chang tih te, an inbuatsaih mek thu te a sawi.
Hnam thinlung put theihna tur zirna kalpui: Education Minister
![](https://theaizawlpost.org/wp-content/uploads/tap_logo-min-large.jpg)