Mizo Zirlai Pawl chuan Inrinni khan Aizawl khawpui hmun hrang hrangah hnamdang dan loa khawsa dapchhuah hnatlang a nei a, inner line permit (ILP) nei lo mi 78 chuang bakah kum tling lo hnathawka chhawr engemawzat hmuhchhuakin, thuneitute kutah an hlan.MZP chuan sawrkar leh thuneitute pawhin theihtawp chhuaha hma an lak mek lai a, tuk khat hnatlana hnamdang permit nei loa khawsa leh dan loa sumdawng thahnem tak man chhuah tur an awm chu pawi a tih thu a sawi a. Dan loa khawsate hi permit neilo bakah permit dam hun chhung zo tawh an ni hlawm tih a sawi a ni.
‘India danpuiin a bik taka min humhalhna, ILP hi a nihna ang taka hmang tur leh a pekchhuah danah pawh fimkhur lehzuala kalpui turin thuneitute kan ngen nawn a. Local council leh village council thuneitute, hnamdang permit issue chungchangah document felfai lo chu hriatpuina lehkha pechhuak tawh lo turin kan ngen a ni,’ a ti.
Dan loa hnamdang khawsate dapchhuah hnatlangah hian MZP hruaitute bakah college hrang hrang Students’ Union hruaitute leh Hnampual Zirlai Pawl hruaitu an thawkchhuak a ni.
Hnamdang dan loa khawsa an hmuhchhuahte chinchang chu ngun takin a enzui dawn a, thawnkir (push back) an nih dan pawh an enzui dawn tih sawiin, ‘Mizorama dan loa hnamdang sumdawngte dapchhuakin a tul angin hma kan la zel dawn a, hnamdang dan loa sumdawngte dapchhuah kawngah mipui thlawpna kan ngen a ni,’ a ti.
Hnamdang dan loa awm 70 chuang hmuchhuak
