Mizo Zirlai Pawl chuan an ngenna ngaipawimawh loa MLA inthlan tura hnamdang pasal nei candidate-te leh a candidate tu party chu vote lo ngam turin mipui an ngen.
MZP Gen. Hqrs. thuchhuak chuan, MLA inthlanah hnamdang pasal nei candidate-a dah lo turin political party tinte vawi tam a ngen a. An ngenna ngaipawimawha hnamdang pasal nei candidate-a dah lo party-te chungah MZP chuan lawmthu a sawi tih a sawi a ni.
2022 December 19 khan party tinte hnamdang pasal nei candidate-a dahlo tura ngenna a siam hnu ah kumin August 21 khan party tinte ngenna a thawn nawn a. Party thenkhat hotute pawh hmuh an nih bakah October 13 khan press conference neiin, candidate-a hnamdang pasal neite dah lo turin ngenna siam leh a ni tih MZP hian a sawi a. An hmalakna in ngaihpawimawh a hlawh loh avangin October 20 khan Aizawlah “Hnam humhimna kangzawh” huaihawt a ni tih a sawi.
‘An intih Mizo leh Mizo loh te, khawtlang tana an tangkai leh tangkai loh te, tribal certificate an neih leh neih lohte hi kan issue a ni loa, hnamdang dik tak a nih avangin, an nupuite Mizoram Assembly House-a thu turin hnam tan a him lo takzet a. Tuna kan hmalaknain awmzia a neih loh chuan, hnamdang pasal neite kaltlangin kan ram rorelna chu hnamdang kutah a luh mai a hlauhawm hle,’ an thuchhuah chuan a ti a. Mizo hnam damna turin hnamdang pasal nei candidate hnawla vote lo ngam turin Mizo mipui a ngen bakah vawi tam an ngen chunga hetiang mi candidate-a dah luitu party pawh tun inthlanah hnawl ngam turin Mizo mipui a ngen tih a sawi.
Hnamdang pasal nei candidate leh an party vote lo turin ngen
