Hnamdang tawng thumal 131
Mizo tawnga sengluh tum mek
Mizo tawng humhalh leh tih hausak kawnga hma la tura sawrkarin a din Mizo Language Development Board chuan Sap tawng leh Hindi tawng, Mizo tawng ang maia kan hman zui tak thumal 131 chu a pawm dawn.
Mizo Language Development Board (MLDB) Governing Body chu a tum 5-na atan Ningani khan an chairman R Lallianzuala kaihhruaiin an thukhawm a. An thurel zingah, tawng dang (English leh Hindi) thumal 131 Mizo tawng ang maia kan hman tawh chu a sipel Mizo tawnga ziaha Mizo tawnga pawm nise a ti a. Sap tawng (science lam) thumal Mizo tawnga sengluh atana rawtna lut, Mizo Tawng Zempui Kawmiti thu chu pawmsak an rel a. Chutihrualin thumal dik lo siamthat a, thumal tin zirchiana telh tur leh telh loh tur member-ten an lo endik theihna turin karkhat chhung hun inpek a ni.
Mizo A, AW, B hawrawp pumpui, a lam rik dan, a hman dan leh hawrawp indawt dan chungchang ngaihtuah a nih hnuah, lo zirchiang turin Research & Documentation Committee kuta dah a ni a, an ni hian an rawtna thla khat chhunga Board-a thlen tura tih a ni. R&D Committee rawtna dawn hnuah inrawnkhawm tura rel a ni.
Mizoram State University-ah Mizo Linguistics subject zirna neih nise tih rawtna chu telh a nih ngei theihnan Higher & Technical Education department-ah rawtna thehluh tum a ni.
Heng lehkhabu – Grammar of the Lushai Language by Dr Brojonath Shaha, Exercise in Lushai Dialect by TH Lewin leh Pu Buanga Log Book chu tuaihnum a, office-a vawnthat atan buatsaih nise, an ti a. MLDB Grammar Committee lehkhabu hming atan “Mizo Tawng Grammar” pawmsak tura rawtna chu pawm a ni.
Thutkhawmah hian 8th Schedule chungchanga hmalakna powerpoint presentation neih a ni a. Mizo tawng dinhmun leh than dan, a hmangtu zat sawizau a ni bawk.
Hnamdang tawng thumal 131 Mizo tawnga sengluh tum mek
