Labour, Employment, Skill Development and Entrepreneurship department chuan hna chi 200 chuangah hnathawh tur zawng leh hnathawktu tur zawngte inzawn hmuh theihna tur mobile application – Mizoram Labour Link a siam.
Nilaini khan he mobile app hi LESDE minister Lalnghinglova Hmar chuan a tlangzarh a. Khawvel thiamna thang zel ban pha ve loa kan awm chuan kan hnufual tawlh tawlh a, chu thiamna thang zela tel ve theia mipui tana tangkai tur siam a ni chu a lawmawm tih a sawi. Tunlaia khawvel intlansiakna, hmasawna thlen theitu tangkai ni bawk chu digital infrastructure a ni, tiin, mihring thiamna tihpun chu digital khawvelah a awm tawh tih a sawi a ni.
LESDE director John Tanpuia sawi danin, ‘Mizoram Labour Link’ mobile application hian nitin inhawhfa thin leh a chhawrtu tur indawr tawnna – digital platform atana duan a ni a. An inkara hlawkna tel ve tuma lo inrawlh (middlemen) tih tlem a, hnathawh tur zawnga hmun him lo laia worker/ labour fuankhawmna tih bo leh, nitin inhlawh thinten an thawh hlawh dik tak (fair wages) langtlang taka an hmuh theihna chu an siam chhan a ni.
He application hi a hmangtuin awlsam taka a hman theih tura duan a ni a, hna zawngtute leh a chhawrtuten awlsam takin an smartphone kaltlangin direct service an hmu thei dawn a ni.
Hna zawnglai (worker) leh a chhawr theitu tur (employer) inziahluh theihna a awm a, hna awm tarchhuah (job posting) theih leh dil theihna, SMS leh push notification hmanga inhriattir theihna siam niin, hna zawngtu leh hnathawh tur neitu inbiakpawh theihna a awm a ni.
Awmna hmuna azir leh thiamthil bik azira hna zawn leh tarlan a ni a. Aizawla cheng tan Aizawl huamchhunga hna thawktu tur zawngin thu a dah kha an lo hmu mai a, chutiangin Siaha ami pawhin Siaha huamchhunga an inzawn hmuh theihna turin duan a ni.
Hei bakah hian nitina inhlawhfa thinten hamthatna an dawn theih angte pawh he mobile app kaltlang hian an hriat theih dan dah tel a ni bawk.
Hnathawh tur duh leh thawktu tur duh inzawnna hmun siam
