Mission LiFE (Lifestyle for Environment) hnuaia hmalakna pakhat atan Mizoram EIACP Hub – Mizoram Pollution Control Board (MPCB), Govt. Hrangbana College Eco Club leh ITI Veng Local Council tangho chuan Thawhlehni khan Lawibual lui thianfaiin an hnatlang a, mi 80 vel an thawkchhuak. Lawibual lui hi ITI Veng Local Council huamchhunga awm niin, Chite lui fintu a ni.
Mizoram EIACP Hub programme officer Benjamin Lalnunsanga Colney chuan Mission LiFE chungchang sawifiahin, India kaihhruai khawvel huap hmalakna (global mass movement), mimal leh khawtlang anga kan nitin nunphung leh nundan, kan chhehvel leilung nena inhnerem tura inthlak danglam tura inzirtirna leh inkaihhruaina a ni tih a sawi.
Lawibual lui hi August 2022 khan Central Pollution Control Board chuan lui thianghlim lo ‘polluted rivers’ a puan zingah a tel tih sawiin, hei vang hian Mizoram EIACP Hub chuan mipui hnenah kan chhehvel lui tuite thianfai a, uluk taka humhalh leh thianghlim taka enkawl a pawimawh zia inzirtirna ni pahfawmin ‘Lawibual lui thenfai hnatlang’ hi buatsaih a ni tih a sawi.
Lawibual lui thenfai hnatlanga thawkchhuakte hian Mission LiFE thutiam la in, kan chhehvel environment humhim tur leh chumi atana nunphung thlak danglam ngaite pawh thlak danglam turin an intiam thar a ni.
Hnatlangin Lawibual thianfai
