Save the Riparian hmalakna kal mekah Thawhlehni khan Aizawl Municipal Corporation nen tangdunin Tuikual lui hnar thenfai hnatlang neih a ni.
Hnatlangah hian mi 150 chuang thawk chhuakin, Tuikual lui hnar, Khatla Veng Field thlang kawr atangin bawlhhlawh chi hrang hrang – plastic um, sarang, burchhia, pawnchhia leh a dangte an lachhuak a, AMC lirthei hmangin bawlhhlawh hi Solid Waste Management Center Tuirialah paih nghal a ni.
Hnatlang tan hma in Aizawl mayor Lalrinenga Sailo chuan, Save the Riparian hmalakna chhuanawm a tih thu a sawi a. AMC-in Aizawl khawpui faina kawngah theihtawp a chhuah mek tih sawiin, nasa lehzualin hma a lak zel tur thu a sawi a ni.
Hnatlangah hian mayor bakah deputy mayor R Thanglura, executive corporator ho, corporator ho, Municipal commissioner Er Lalhriatpuia leh AMC office-a thawktute leh Save the Riparian lam an thawk chhuak a ni.
AMC chuan bawlhhlawh paihna hmun siamah chauh bawlhhlawh paih a, veng tina bawlhhlawh khawn thinah chauh kan bawlhhlawhte tha taka thliara paih thin turin Aizawl mipui a ngen a. ‘Faina leh thianghlimna kawngah hma sawn kan tum avangin, loh theih lohin dan leh inkaihhruaina zawmlote chungah AMC chuan hma a la zel dawn tih Aizawl mipui kan inhriattir a. Aizawl mipui tam zawkin faina kawngah rilru dik tak kan pu chho mek chu a lawmawm rualin, mi tlemte avanga kan khawpui hmai a lang bal thin hi a pawi a. Kohhran leh tlawmngai pawl leh mipuiin kan khawpui tihfai kawnga thawkchhuak zel ang u,’ AMC thuchhuak chuan a ti.
AMC hian tunhnaia Silaimual piaha kawngpui dunga bawlhhlawh tam tak chhek hnawkte thianfaiin, a mawhphurtu an chhui mek tih an sawi a ni.
Hnatlangin Tuikual lui thianfai
