Red Bull driver Max Verstappen chuan kumina F1 intlansiak vawi 10 awm tawhah a vawisarihna atan hnehna changlehin, Pathianni Spanish Formula One Grand Prix-ah hnehtu a ni a, Circuit de Barcelona-Catalunya, Barcelona, Spain-ah a zawna kum thum a chakna a ni ta!
Season kal laia Dutch driver dangbet thei pathum kan hmuh tawh zinga pakhat McLaren pole-sitter Lando Norris chuan a hmahruaina hloh nghal thuai mah se pahnihnaah a thleng a, driver world c hampionship standing-ah pawh Verstappen hnungdawltu a ni chhunzawm zel.
Tun kha Verstappen tan a career-a vawi 61 a chak tlinna chiah niin, standing-ah point 219 hmu tling tawhin, Norris (150) leh Leclerc (148)-te’n an dawt.
World champion vawisarih ni tawh Lewis Hamilton pawhin kumina a vawikhatna atan lawmman semna dawhsan a chuangkai ve leh ta nge nge a, pathumnaah thlengin, a Mercedes team-mate George Russell chu podium lawn pha lo tawk chiahin palina a ni thung.
Barcelona khawpuia Circuit de Catalunya ni sensa at hnuaia hnehna a sualchhuah leh hmangin triple world champion Verstappen khan championship-a a hmahruaina chu point 69-in a pawtfan ta a; fastest lap hmanga bonus point hmu Norris chuan a tir lama a tlan muan a tuar a, pole position atanga tlanchhuak chungin first corner-ah pathumnaah a tlahniam hman a, pahnihna erawh a ni zui ta tho a ni.
Ferrari khalhtu Charles Leclerc chuan chequered flag a thlen laiin second 0.3 lekin Russell a pha lo a, pangana luahin, a team-mate Carlos Sainz chu a chipuite hmaah parukna a ni pha hram.
McLaren driver Oscar Piastri pasarihna niin, pariatna Red Bull khalhtu Sergio Perez hnunga thleng Alpine driver pahnih Pierre Gasly leh Esteban Ocon-te chu point hmu pha hnuhnung pahnihte an ni.
Kartawp hian Red Bull Ring lamah Austrian Grand Prix an tlan zui leh dawn a; Spielberg-ah hian tun season-a sprint race vawiruk awm tura a vawithumna an tlan tel nghal dawn a ni .
Hnehna nen Spain-ah Verstappen inlan leh
