Nimin, Pathiannia Australian Open khelh tan tak women’s singles first round match pakhatah Grand Slam tournament a hmachhawn hnuhnung vawi 12-a tum 11 zet semi-final lut thei world number one Aryna Sabalenka chuan tennis legend pahnih Roger Federer leh Rod Laver-te hmuh laiin ‘pressure’ lian zet hnuaiah 6-4 6-1-in French wildcard Tiantsoa Rakotomanga Rajaonah a hneh a, Rod Laver Arena-ah second round a lut.
Sabalenka AO bul tan lai hi a hmun ngeiah vawi ruk lai Aussie Open men’s champion ni tawh Federer leh he hmuna vawi thu champion tawh Laver-te’n tlar hmasabera thu chungin an thlir a; hnehna a chan hnuah Belarusian hian fiamthuin tennis mi lian pahnih kha a inkhelh laia va melh loh hram hram a tum thu a sawi.
Melbourne title pahnih hawn ve tawh Sabalenka hian inkhelh banah Federer leh Laver-te hi a selfie pui nghe nghe.
Australian Open-a champion ropui pahnihin a inkhel lai an thlir ve kur chungchang leh tualchhung nula laka bul tan boruak chungchang Sabalenka hian tarlangin, “Tennis ropui hmuhtir ngei che u ka duh a, chu chu ka tan hamthatna a tling a, tlem talin ka inkhel kha hmuhnawm in tih ve ngei ka beisei.
“Pressure min siam ve tlat avangin anni pahnih kha en loh hram hram ka tum,” tiin bultanna inkhela tennis hming hraw pahnih uap nat dan a sawichhuak.
Inkhel dangah Wimbledon leh French Open runner-up Jasmine Paolini pawhin 6-1, 6-2-a Belarusian Aliaksandra Sasnovich hneh chungin Rod Laver Arena-ah bawk a opening match a paltlang.
26th seed Ukrainian Dayana Yastremska chu 6-4, 7-5-in Romanian world number 79 Elena-Gabriela Ruse lakah a tlawm a; Kazak Yulia Putintseva chuan Beatriz Haddad Maia laka 3-6, 7-5, 6-3 hnehna nen Brazilian fans a tilunghnur.
Hnehna nena bul tan Sabalenka
