Hnuk ulh teuh chunga chak Raducanu

Hnuk ulh teuh chunga chak Raducanu
Eastbourne second round lut turin tun Thawhlehni khan British number one Emma Raducanu chuan 6-7 (5-7) 6-3 6-1-in Ann Li a hneh a, first-round comeback a sualchhuah hnu hian hnukulh teuh chungin inkhel tan hmaa chanchin chhia thenkhat a dawn thu leh rilru lama harsatna a tawhte chuan a hnehna chan chu a tihlu zual niin a sawi.
Kum 22-a upa Radu hian set hmasaber a hloh zet a, hnehna a chan hnuah mittui nen a hun tawn a sawi a; eng chanchintha lo chiah nge a dawn tih sawichhuah a tum loh thu leh a chanchin hriat chu hneh ngei a tum a, set khatnaah khan a thu dawnin rilru lama a nghawng deuh thu leh engkim hriatpui vektu Billie Jean King Cup lama a team-mate Fran Jones-i thlapwnain chakna a pek thu a sawi.
Wimbledon atana a inbuatsaihna kal mekah Raducanu hian nizan khan quarter-final luh inchuh match pakhatah Australian tleirawl Maya Joint a tum zui leh a, result tarlan hman a ni ta lo.
World number 38 Raducanu hian a tum lina atan June ni 30 atanga khelh tan tur Wimbledon a khel leh dawn a, kum 2021-a a inlan vawikhatna atang khan tum hnih fourth round a thleng ve tawh tih loh chu an ram tournament-ah hian thlensan a harsat fat fat khawp mai!
Grass-court grand slam inbuatsaihna lian khelh zawh tak Queen’s lamah khan quarter-final a thlen phak avangin 2021 US Open champion hian kum hnih chhunga a vawikhatna atan tun thla hian British number one title a neikir leh thei hram a ni.
US Open title a lak hnuah hliam tawp hlei thei loin chimbuai reng mah se a rawn kang chho leh deuh a, mahse, karliamta khan hnungzang na a chhuah leh deuh avangin Raducanu hi Berlin Open lamah a inlan thei lo leh rih a, mahse, 64th-ranked Li laka fiahna khawng ve thak chu a paltlang thei ta hram tho a ni.
Eastbourne mipa singles lamah British number two Jacob Fearnley chu Italian fifth seed Flavio Cobolli lakah nuamsain a chak thung a, darkar khat leh minute nga lek chhungin Fearnley hian 6-2 6-2 hnehna nuamsa a chang.
Kum 23 mi Scot hi tunah world number 51 ni mekin, grass chungaha chetha mar tluang angreng phian a, karliamta Queen’s tournament-ah pawh khan quarter-final a thleng hial a, last 16 lamah American Marcos Giron a hmachhawn zui leh.