Arnold leh Artan Balla te unau chuan an rolla bolla skills hmangin Guinness World Record an siam. Arnold, kum 28, chu a bawk phek a, a hnungzangah a nau, Artan, kum 22, chuan thil mum tawlh sawn awlsam tak chungah balance board dahin, chutah chuan a ding a, a din fel hnuah Arnold chuan push up a ti ta a ni. Arnold-a’n push up a tih lai hian Artan chu a tlak loh nan a position a insiamrem zung zung a ngai a, hetiang hian push up vawi 11 an ti thei a, Guinness World Record an siam ta a ni.
Arnold leh Artan te hi circus performer niin, kum 15 chhung circus acrobat an lo ti tawh a ni. An unau hian Albanian an ni a, tunah chuan New York, USA-ah an cheng tawh. Tun hi an record siam vawi khatna a ni tawh lova, lu (head) chunga rolla bolla set a mit tuam chunga in-balance rei thei ber record an lo siam tawh a, second 61.95 an ti thei.
Arnold chuan tuna an record siam chu thil awlsam lo tak a nih thu sawiin, “Mipahnih ngaihtuahna hmun khat neia kan awm a ngai,” a ti a, “Push up te pawh a awlsam kan tideuh tawh a, record siamna tur thil danglam deuh hlek kan ngaihtuah a ni,” a ti bawk.
Artan chuan, “Keima tan a harsa zawk mahin ka hria, push up a tihlaiin a hnungzang a che nasa a, chu chuan board a tichein a titawlh nasa a, rilru sawrbing a, uluk theih tawpa awm a ngai,” a ti ve bawk.
Hnungzanga balance board a ding awm chunga push up tiin record siam
