Hnute cancer ven nana chaw tha
World Health Organisation (WHO) chuan 2020 hnulamah chuan hnute cancer a tam tawh dawn hle niin an sawi lawk tawh a, khawvela hmeichhia pariat zelah pakhatin a damchhunga hnute cancer neih theihna risk nei tur angin an chhut.
Hetiang a nih avang hian hmeichhe tan hnute cancer risk tihniam thei chaw ei tam a pawimawh dawn hle a ni. Tun tumah hian Fortis Memorial Research Institute-a senior clinical nutritionist & coordinator leh Metropolis Healthcare, Mumbai-a consulting nutritionist Dr Vandana Mathur ten hnute cancer risk tihniam thei chaw tha ni a an sawi Times of India-in a tarlan te kan rawn chhuah chhawng e.
1. Flaxseed: Flaxseed hi a oil ang pawhin lei mai theihin a awm, omega-3s, lignans leh fibre a pai tam a, chu chuan hnute cancer siamtu cancer cell lakah min veng thei. Flaxseed ei mai theih a ni a, flaxseed oil pawh salad dressing velah te hman theih a ni a, cookies leh muffins siam nan te pawh hman theih a ni.
2. Brazil nuts: Brazil nuts hian selenium, fibre leh phytochemicals a pai hnem a, kan taksain natna a dolet theihna tichakin, kan taksaa bâwk (tunour) thang tur a veng thei bawk. Tam tham taka ei pawh a ngai lo va, thum khat vel nitin ei theih a tha.
3. Purunvar: Purunvar hian cancer beilettu compound allium a pai tam hle. Purunvar leh a laichin (timai ila) hnaivai ho, heng purunsen, leeks, scallions leh chives te pawh hian taksa-a bâwk thang tur a veng thei, hnute cancer risk a tihhniam theih bakah ril leh mipa serh cancer risk te pawh a tihniam thei. Purunvar pum hnih khat tuktin ei ziah la, chu chuan cancer risk a tihniam thei dawn a ni.
4. Theibuhfai: Theibuhfai (pomegranate) hi hnute cancer risk tihniamtu thei tha berte zinga mi a ni. Polyphenolan ellagic acid leh anti-oxidant properties neiin, hei hi cancer veng theitu tha tak a ni. He thei tui tak hi a man a to deuh nain i ei ngun theih chuan i taksa tan a tha hle ang.
5. Thlaihnah hring duk: Thlaihnah rawng hring duk deuh ho hian cancer insiam tur vengtu pawimawh tak tak an pai hnem hle. Fibre, vitamin B, phytochemicals, chlorophyll leh thildang an pai hnem a, chu chu cancer veng theitu tha tak a ni. I chawhmehah khan a tam thei ang ber thlaihnah rawng hring tak deuh deuh ei tel thin ang che.
6. Sangha: Sangha-ah rau rau pawh salmon hian omega-3, vitamin B12 leh D a pai hnem hle a, kan taksaa cancer cell lo thang tur vengtu nutrient pawimawh tak a ni. Vitamin B12 (methylcobalamin) te hi cancer treatment atan pawh a hmantlak hle a ni.
7. Broccoli: Cruciferous vegetable ang chi broccoli, parbawr, brissels sprouts, zikhlum leh kale te hian sulforophane leh indoles an pai hnem a, chu chu cancer cell thang tur veng theitu an ni am a bikin hnute cancer, phing, thal (lymphoma), mipa serh keh chuap cancer veng theitu a ni.
8. Green tea: Regular taka green tea in thin hian hnute cancer risk a tihniam thei. Phytochemicals a pai hnem a, chu chu taksa hrisel nan a tha hle. Nitin green tea no 2-3 in ziah hian cancer risk a tihniam thei.
9. Hmarcha: Eng hmarcha pawh a tha vek, cancer beilet theitu phytochemical emaw nutrient emaw an pai. Hmarchaah hian capsaicin a awm a, chu chu cancer cell thang tur dotu a ni. Hmarcha hring hian chlorophyll a pai hnen a, chu chu cancer siamtu dotu tha tak a ni. Hmarcha sen pawhin capsaicin leh antioxidant carotenoids a pai hnem hle.
10. Aieng: Aieng hian cancer doletu compound chikhat curcumin a paihnem hle a, a bikin hnute cancer, gastrointestinal, chuap leh vun cancer te veng theitu pawimawh tak a ni. Chuvangin chawhmeh kanah te khan aieng lo telh uar deuh rawh le.
Hnute cancer ven nana chaw tha
