Hockey thiam Lalremsiami

India ram hi khawvela mihring tama ber a ni a. Mihring maktaduai 1428 chuang zet awm ang chhut a ni. Khawvela mihring tamna ber India in inelna lian Olympic-a a hlawhtlinpui ber chu Hockey a ni. Mizoten ‘Vai vuak’ kan tih mai Hockey hian ngaihhlut a hlawh hle. Chu inelna ngaihhlut hlawh tak Hockey ah chuan hming langsar tak pakhat a awm a, amah chu Hockey thiam Lalremsiami a ni.
Mizo hmechhe zingah Olympic a inlan hmasa ber Lalremsiami hi Lalthansanga leh Lalzarmawii te fa pariat zinga a pangana ni turin March 30, 2000 khan College Veng, Kolasib-ah a piang a. Kum ruk mi lek a nih laiin na takin a damlo a, tawngtai dam thei panpui a nih hnuin damna a chang a. Heta tanga tun thlengin nula harhvang leh hrisel tak a ni zui ta a ni.
Kum 11 leka upa a nih laiin Remsiami hian Hockey a hmelhriat tan a. Hockey-a Mizo senior player T. Lallawmawmi kaihruainain Diakkawn Field sirah Hockey an zir a, an khel ve lauh lauh thin. Hockey a khelh hmasak ber atangin Remsiami hi a danglam, a zei hawi a, a man chak a, a thiam bik bawk. Chutiang mi chu a nih vangin Hockey zirtirtu Malawmi hian a chungah beiseina sang tak a nei a, Hockey a mi bik a nih theih rinna lian tak a nei nghal.
Malawmi hnuaiah nuam ti takin Hockey zir mah se Remsiami hi a reh ta daih a. A reh rei tak vangin Malawmi ngaih ?ha loin a ngaihven a, an inah meuh kal chilhin zir chhunzawm turin a sawm a, a chhungte a hmin thei mai lo. A nu leh pate hi lo nei mi an ni a. Ram hna thawkin an riak fo thin. An feh hlan leh an riah hlanin Remsiami hian a naute enkawl a, a ngai thin a, khawsak a rel a ngai thin bawk. Chhungkaw harsa tak an nih vanga Hockey khel chhunzawm ta lo a lo ni nghe nghe. A chhungte hnenah dilsak a, tum li ngawt an inah a lenchilh meuh chuan Malawmi hian Remsiami nu leh pate an hmin thei ta nge nge a, Remsiami’n hockey zin kawng a zawh tak tak tan ta.
Kum 11 mi lek a nih lai, kum 2011 khan Thenzawla Hockey zirna a pan. SAI leh Sport & Youth Services enkawl Hockey Women’s Training Centre ah hian kum 2016 thleng a awm a. He hmuna a zir lai pawh hian Mizoram tan fehchhuakin, Mizoram player pawimawh tak a ni thin.
Trial an pal tlang hnuin November, 2016 khan Thenzawla Hockey zirlai mi pangate, Remsiami leh mi dang palite chu Delhi National Academy a lut turin thlan an ni. National Academy a zawm atanga thla khat hnu lekah Remsiami hi India Junior team a tel turin thlan a ni nghal a. December, 2016 khan a vawi khat nan India tan a fehchhuak a. Asia Cup ah an champion nghal nghe nghe.
India Junior team-a a awm hnu hian India Senior team te nen Bhopal leh Begaluru lamah training an nei tlang ?hin a. Senior team te nen hian inkhelh fiam changte an nei ?hin. A taima a, a tui bawk a, Remsiami hian hma a sawn chak em em a, training naa a che velin coach te mit a tlung thei hle.
Junior team-a a awm lai hian tlai khat chu senior team meeting ah tel turin koh tel a ni ve teh mial. A ngaihna hre lo, tim leh inkilh tawih ru takin senior team meeting ah chuan a khual ar ?hut ve ran a. Meeting tawp lamah Netherlands hmachhawn tur India Senior team puanchhuah a ni a. A rin phak loh leh a beisei phak reng reng lohin Remsiami hming a lo tel ve reng chu niin, a awih lo a, a ringhlel hial. An senior team player ten lawmpuina an hlan liam liam hnuin India senior team tan khel tura thlan a ni tih a ring a, a pawm ngam ve ta chauh a ni. He ta tang hian Remsiami hi a kal zel a. India player pawimawh a ni zui ta reng.
Common Wealth Games 2018 ah khan Hockey ah India player naupang ber a ni a. Asian Games, World Cup leh Olympic meuh pawh India player pawimawh a ni zel a. Women’s Senior World Cup 2018 ah Italy an hmachhawn tumin Remsiami hian India tana a goal hmasa ber a thun a. Italy an hmachhawn ?um hian ‘Man of the match’ ah thlan a ni nghe nghe. Kum 2019 khan Asia khawmuala tleirawl ?ha berah thlan niin ‘FIH Rising Star of the Year’ chawimawina a dawng ta hial a ni. He thu buatsaih lai thleng hian India tan vawi 156 khelin, goal pawi-mawh tak tak goal 41 a thun tawh.
Junior Asian Cup ah India a champion pui a. Asian Games, Asian Games, Asian Champions Trophy leh Youth Olympic a Silver Medal a lak bakah Common Wealth Games 2022 ah Bronze medal a lakpui leh bawk a. Asian Champions Trophy 2023 leh 2024-ah a champion pui a. 2024-a an champion tum hian final ah ‘player of the match’ ah thlan a ni hial nghe nghe. Inelna hrang hrangah hlawhtlinna changin, hming langsar a ni chho ta zel.
Lalremsiami hi kum naupangte ni chunga Hockey zira awm bo, hnam dang kara awm zui ta a ni a. A kum la naupang hle mah se a tum a ruh a, a pau a khauh a, a huaisen bawk. Bible chhiar leh tawngtai uar mi a ni a, a zinna apiangah Bible a keng ziah thina a. Chhiarna hun remchang a neih ang angah a Bible ken chu a chhiar mai thin. Kum khatah vawi khat tal Bible chhiar chhuah ziah a tum a, a chhiar chhuak nual tawh bawk. Bible ngaina tak a nih rualin lehkhabu dang pawh a chhiar nasa a, lehkhabu ngaina tak a ni tel bawk. Hmun dang daiha awm ni bawk mah se lehkhathiam nih a tum tlat a, Govt. Hrangbana College-ah admission tiin, BA a zir hial a ni.
India Junior leh senior team a zawm tir hian tawng chungchangah harsatna a tawk thin. |awng a thiam miau loh vangin coach ten khelh dan tur an sawi loh ang tlat khelh chang a nei a. Coach ten thinrim taka an hauh vanga mittui tlak zawih zawih changte pawh a nei ve thin. A tiang (Hockey Stick) ni lo, mi dang ta a hman tum pawhin a buai ru em em a. ‘Ka tiang lo zawk ka hmang’ ti thiam bik hek lo ‘Nai nai nai’ a tih ngawt changte pawh a awm. Chung hun harsa leh thimah pawh chuan lalnu Ropuiliani ang maiin a huaisen a, a zam ve ngai lova, a hnual ngai hek lo. “Coach ten khelh dan tur min hril ang lo hlira ka khelh tum pawhin ka tawngtaina Pathianin a chhang a, goal ka thun ve leh hlauh thin”, a ti a. “|awng thiam lo mah ila Hockey ka thiam a lawm” tia inhnemin, ka infuih mawlh mawlh thin”, tiin Hockey thiam Remsiami’n hun harsa a tawn changa a inhnem thinna thu a sawi.
Kum 2019 khan India tan inelna pawimawh tak hmachhawn a, Japan khawpui Hirosima-ah a thang bo hlanin amah hmangaiha ngaihtuah em em rengtu a pa Lalthansanga chuan nat lawk em em awm lovin a boral san. Olympic Games qualyfing match-ah semi-final an khelh hma deuh lawkin Remsiami hian a pa boral thu hi a hria a. Hun harsa, khirh leh khawharthlak takah a pa duh ang ngeiin a mawhphurhna hlen a duh a, inelna a hmachhawn zui a, Olympic khel turin an tling zui ta nghe nghe. Infiammite khawmpui lian ber Olympic meuh khel tura tlin chu a ropui a, a hlimawm em em bawk. Chung a hun tawn ropui leh hlimawm tak takte chu a pa hrilh a chak a, apa Lalthansanga chu biak theih a chang tawh si lo. He leiah a pa hmu tawh dawn lo mah se van atanga lo hmuin, a hlimna te tawmpuiin, a hlawhtlinnate a chhuang ve ngei dawn tih Siami hian a hria a. A pa lawm siam turin a tumruh zual sauh a, a inthlahdah ve mai mai ngai lo.
Hun a kal a, boruak a intheh veng a, Remsiami tan ni chhuak a mawi zual zel. Thenzawlah Hockey a zir tirhah chhungkaw harsa tak an nih vanga zah pawh sawi thei lova thirchhia zawng a, hralh thin khan a thawh a chakna Railway-ah hna a hmu ta hial a. Hlawh nei chungin a nuam tih em em Hockey chu a lo khel thei ta. Hlawhtlinna hrang hrang chang a, a chawimawi thin India in a chawimawi let a, thil pek hlu tak tak a dawng ta nual bawk. Chhungkaw harsa tak atanga pianga sei lian a nih vanga nuapang berh ve tak thin kha a hlawhtlinna vangin nula awhawm, nula vannei a lo ni ta. Chu nula vannei chu Hockey thiam Lalremsiami a ni