Hollywood-ah ‘F1’ a tlan chak ber
Formula One racing movie, Brad Pitt channa ‘F1: The Movie’ chuan tun weekend kalta khan US-ah cinema hall ticket hralhna atangin dollar maktaduai 55.6 la lutin, box office No.1 a ni. Hetihlai hian horror movie ‘M3GAN 2.0’-in beisei a pha lo viau nain, top 5-ah chuang a lang pha tho e.
Hollywood box office ranking hi chawlhkar tawp, Zirtawpni-Pathianni a US-a cinema hall ticket hralhna sum chevel atanga teha siam thin a ni a, ‘F1: The Movie’ hi sum sen tamna niin, marketing tel lo pawhin dollar maktaduai 200 senna niin, marketing nen phei chuan dollar maktaduai 300 a hnaih thuak dawn a ni.
Brad Pitt leh Damson Idris te channa ‘F1: The Movie’ hi US pawnah pawh a chetha viau a, dollar maktaduai 88.4 la lutin, tihian opening weekend-ah khawvel huapin dollar maktaduai 144 a la lut nghal thei a, Brad Pitt channaah opening weekend-a khawvel huapa sum la lut tam ber a la ni.
He film-ah hian Pitt chu F1 driver inhliam avanga chawl tawh, mahse, driver naupang zawk (Idris) nena thawk dun tura rawn kir leh ta chanchin vel tarlanna a ni a, Hollywood star Javier Bardem hi F1 team neitu lemah a chang ve bawk.
Film tlangzarh thar, horror movie ‘M3GAN 2.0’-in beisei a pha lo viau a, opening weekend-ah US-ah dollar maktaduai 10.2 la lutin, No.4 a ni. A film hmasa zawk-in January 2023-a an tlangzarh khan opening weekend-ah dollar maktaduai 30.4 a la lut thei a, tun tumah pawh hian opening weekend-ah a tel berah US-ah dollar maktaduai 20 tal la lut turin an beisei a, mahse, chu pawh chu a pha ta lo hle a ni. He film hian US pawnah dollar maktaduai 17.2 la lut bawkin, tihian opening weekend-a a lak luh zawng zawng chu dollar maktaduai 27.4 a ni. A film siam nan hian marketing tel loin, dollar maktaduai 25 chauh an seng ve thung.
Box office-a kar hnih chhung No.1 ni tawh ‘How to Train Your Dragon’-in dollar maktaduai 19.4 la lut lehin, No.2-ah a tawlh ta a, he film hian kar thum chhungin khawvel huapin dollar maktaduai 454.4 a la lut tling ta a ni.
‘Elio’-in dollar maktaduai 10.7 la lut lehin No.3 a ni a, he dystopian zombie film hian kar hnih chhungin US-ah maktaduai 42.2 a la lut tling ta a, US pawna a lak luh nen chuan dollar maktaduai 72.3 a tlin ve ta. He film hi marketing tel loin, dollar maktaduai 150 senga siam niin, tuna a kaldan en chuan an sum sen an hmuchhuak lo mai ang tih a hlauhthawnawm khawp mai.
‘28 Years Later’-in dollar maktaduai 9.7 la lut lehin No.5 a ni a, he film hian kar hnih chhungin US-ah dollar maktaduai 50.3 a la lut tling ta bawk.
Hollywood Box Office Top 10:
1 F1: The Movie $55,600,000
2 How to Train Your Dragon $19,400,000
3 Elio $10,700,000
4 M3GAN 2.0 $10,200,000
5 28 Years Later $9,700,000
6 Lilo & Stitch $6,900,000
7 Mission: Impossible—The Final Reckoning $4,150,000
8 Materialists $2,999,423
9 From the World of John Wick: Ballerina $2,130,000
10 Karate Kid: Legends $1,000,000
Hollywood-ah ‘F1’ a tlan chak ber
