Vairengte chhehvel kudama Burma kuhva rah dahthat thahnem tak man chu khawih chet theih loha dah nia sawi a nih laiin, kuhva chingtu lamin kuhva hi man a ni loa, engemawzat lakchhuah a ni tawh zawk niin an sawi thung tih MNF party chuan an sawi a. Home minister chu kuhva tawlhrutute thurualpui a, kudam atangin a lakchhuah tir nge tih puang chiang turin an phut tih an sawi.
MNF Gen. Hqrs. thuchhuak chuan, Vairengte chhehvelah Burma kuhva ip 9635 man a nih thu leh sawrkarin beihpui thlak zui a, kuhva man hi khawih chet theih loh tura hren nghal a nih thu chinchinthar lama tarlan a nih laiin, Vairengte, Bilkhawthlir, Hachhek Bial Kuhva Chingtu Joint Committee chuan heng kuhva ip hi man a nih loh thu an sawi ve thung a. Kolasib DC kaihhruainaa thutkhawmah Kolasib SP pawhin man a nih loh thu leh thudiklo a darh thu a sawi, niin an thuchhuahah an tarlang. Kuhva chingtute hian sawrkar official-ten thenfai thuai a nih dawn thu leh hnatlang ko rih lo tura an ngenna chu zahawm tiin, July 5 thleng nghak tura an ngenna chu an pawm tih tarlan a ni tih a sawi a ni.
Kudam-a Burma kuhva ip 9635 man anga puanzar leh thianfai tura inringtawk taka an sawiho hnuah, tunah kuhva hi a bo zo deuh vek tawh nia hriat a nih thu MNF thuchhuah hian sawiin, July 3 khan Kolasib SP-ah complaint thehlutin, hma la tura ngenna an thlen a; hei hian khawih chet tawh loh tura an hren nghal loh zia a tichiang tih a sawi.
‘Kuhva smuggling thlakhat chhunga tihtawp tumtu Home minister hian kuhva tawlhru thinte thurualpuiin kudama chhekkhawlte pawh a lakchhuah tir ta mai zawk nge, thudik puang thuai turin kan phut a ni,’ a ti.
Kuhva chingtuten sawrkara rinna nghat a, an harsatna a sutkian sak nia an inhriat lai a, a bum duh chu kuthnathawktute ngaipawimawh ber sawrkar nia insawi tih atan a zahthlak hle tih MNF thuchhuah chuan a sawi bawk.
Home minister-in kuhva tawlhrute a thurualpui em tih kan hre duh – MNF
